İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 285 Hüküm no: 260 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuda v. Nesim’in, bağcı ve saçakçı gediğini İsak v. Mosi’ye sattığı Bağcı ve Saçakçı gediği Mukābele şüd Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ kolancı esnâfına tâbi‘ bağcı ve saçakçı esnâfı tâ‘bir olunur envâ‘-ı saçak ve altın ve gümüşden tesbîh harcı ve devât ve sa‘at ve bıçak köstekleri ve şemse ve emsâli olan emti‘alar nesc ve i‘mâl eden esnâfdan Koyunoğlu Yuda v. Nesim nâm Yahûdi meclis-i şer‘-i münîrde kolancılar kethüdâsı Ali Ağa b. Hüseyin hâzır olduğu hâlde bâ‘isü’l-i‘lâm İsak v. Mosi nâm Yahûdi muvâcehesinde İstanbul’da bezzâzistân-ı atîk sokağında kâin bir tarafından Rum kazzâz ve bir tarafdan Yahûdi bağcı dükkânları ile mahdûd bir kepenkli bir bâb bağcı dükkânı derûnunda mevcûde başmuhâsebe kaleminde mukayyed beyne’l-esnâf gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin mersûm İsak Yahûdi’ye bin iki yüz elli guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ ba‘d sâlifü’l-beyân bağcı gediği tâ‘bir olunan âlât-ı lâzıme-i mezkûre mersûm İsak Yahûdi’nin mülk-i müşterâsı olup benim kat‘â alâka ve medhalim kalmamışdır deyü ba‘de’l-ikrâr ve’t-tasdîk âlât-ı lâzıme-i ma‘lûmenin kaleminde mesfûr Yuda Yahûdi üzerine olan kaydı ref‘ ve terkīn ve yedinde olan atîk sûreti battâlda hıfz-birle mersûm İsak Yahûdi ismine kayd ve yedine mukayyed olan nizâmları şürûtu derciyle bir kıt‘a sûret i‘tâsı bâbında istid‘â-yı inâyet etmeğin istid‘âsı üzerine gedik-i mezkûrun mesfûr Yuda Yahûdi üzerinde olan kaydı ref‘ ve müşteri-i mersûm İsak Yahûdi ismine kayd ile sûret i‘tâ buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 3 Ca sene 1237