İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 286 Hüküm no: 261 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fotini ile Aleniko’nun kasap dükkânı gediğini Yorgi v. Nikola ve Kigo v. Nekom’a sattıkları Kasab Mukābele şüd, ihrâc şüd, bedel 23 Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân hazretlerinin evkāf-ı hümâyûnlarından İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden birinci selhhâneye merbût kasab dükkânlarından İstanbul’da Samatya kurbünde Merhaba köşesinde bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmeye nısfiyet üzere iki kıt‘a mütevellî temessükleri mantûklarınca mutasarrıfeler olup şahısları mu‘arrefeler olan Fotini ve Aleniko Nasrâniyeler meclis-i şer‘-i enverde hâlâ hâssa kasabbaşısı dergâh-ı âlî kapıcı başılarından es-Seyyid el-Hâc Mustafa Ağa tarafından mürsel kasablar kethüdâsı el-Hâc Hasan Ağa b. el-Hâc Osman ve sâir kasab ustaları hâzır oldukları hâlde kasab ustalarından bâ‘iseyi’l-i‘lâm kendi nefsinden asıl ve Kigo v. Nekom nâm zimmî tarafından husûs-ı âtîde tasdîka vekîli Yorgi v. Nikola nâm zimmî muvâcehesinde her biri bi’l-asâle takrîr-i kelâm edüp zikr olunan kasab dükkânı derûnunda mevcûde âlât-ı lâzıme-i mezkûrenin dört hisse i‘tibâriyle birer rub‘ hisselerini yedlerimizde ibkā ve mâ‘adâ birer rub‘ hisselerimizi bedel-i ma‘lûm ve makbûz mukābelesinde ferağ-ı kat‘î-i mu‘teber ile bâ-re’y-i mütevellî asıl ve vekîl-i mersûman Yorgi ve Kigo zimmîlere her birimiz ferağ ve tefvîz eylediğimizde onlar dahi tefevvüz ve kabûl ve hisse tevzî‘lerini ustalar ma‘rifetleriyle tamamen ahz etmek üzere ta‘ahhüd edüp fîmâ ba‘d kasab gediği tâ‘bir olunan âlât-ı lâzıme-i mezkûrenin birer rub‘ hisse-i merkūmelerinde bizim kat‘â alâka ve medhalimiz kalmamağla asıl ve vekîl-i mersûman Yorgi ve Kiko zimmîlerin hakk-ı müfevvazları olmuşdur dediklerini asıl ve vekîl-i mersûm ba‘de’t-tasdîk birer rub‘ hisse-i mezkûreler mersûmetân Fotini ve Aleniko Nasrâniyelerin yedlerinde olan temessüklerinde ifrâz ve ferağlarından asıl ve vekîl-i mesfûrân Yorgi ve Kigo zimmîler üzerlerine tahrîr ve defter-i vakfa kayd ve yedlerine taraf-ı vakıfdan birer kıt‘a temessük i‘tâ buyrulmak bâbında istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 23 C sene 1237