İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 287 Hüküm no: 262 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Muhyiddin b. Musa Fakih vakfı tevliyetinin Seyyid Mehmed Emin Efendi ve Molla İsmail’e tevcihi Vakfiye tevcîhi Ma‘rûz[-ı dâ‘î-i devlet-i aliyyeleridir ki] Zîr-i nezâret-i dâ‘iyânemde olan evkāfdan İstanbul ve gayrıda vâki‘ merhûm Şeyh Muhyiddin b. Musa Fakih el-Kocavî Vakfı’nın vazîfe-i mu‘ayyene ile ber-vech-i meşrûta tevliyetine mutasarrıfe evlâd-ı vâkıfdan ve muhtâre evlâd-ı vâkıf Şerîfe Rüveyde Hanım bt. Mehmed Emin fevt olup tevliyet-i merkūme mahlûle oldukdan sonra ashâb-ı arzuhâlden evlâd-ı vâkıfdan es-Seyyid Mehmed Emin Efendi b. Ömer ve derûn-ı arzuhâlde isimleri mezkûr evlâd-ı vâkıfdan Molla İsmail b. Abdullah’dan her biri meclis-i şer‘-i münîrde ashâb-ı arzuhâlden derûn-ı arzuhâlde isimleri mezkûr evlâd-ı vâkıfdan zâtları mu‘arrefeler Şerîfe Hadice bt. Ömer ve Şerîfe Âişe bt. Ali ve Şerîfe Fâtıma bt. Mehmed Reşid ve Şerîfe Zeliha ve diğer Şerîfe Hadice ve diğer Şerîfe Âişe benât-ı es-Seyyid Mehmed nâm hatunlar hâzır oldukları hâlde tevliyet-i mezbûreye vazîfe-i mu‘ayyene-i mersûmesiyle bâ-berât-ı âlîşân meşrûtiyet üzere mutasarrıfe olan vâkıfın muhtâreleri ve evlâd-ı vâkıfdan mezbûre Şerîfe Ruveyde Hanım bt. Mehmed Emin fevt olup tevliyet-i mezbûre mahlûle olmağın biz el-yevm mevcûde olan evlâd-ı vâkıfın akdemi ve cümlesinin mu‘temed [52b] ve muhtârı olmamızla tevliyet-i merkūme müteveffât-ı mezbûrenin mahlûlünden bi’l-cümle evlâd-ı vâkıfın rızâ ve ihtiyârlarıyla meşrûtiyet üzere iştirâken bize tevcîh buyrulmak matlûbumuzdur dediklerinde hâzırât-ı mezbûrâtdan her biri merkūman es-Seyyid Mehmed Emin Efendi ve Molla İsmail takrîr-i meşrûhları üzere evlâd-ı vâkıfın akdemi ve her vechile umûr-ı vakfı idâreye kādirler ve cümlesinin marzî ve muhtârları olduklarını bi’l-muvâcehe tasdîk ve ikrâr etmeleriyle mûcebince tevliyet-i mezkûre müteveffât-ı mezbûrenin mahlûlünden bi’l-cümle evlâd-ı vâkıfın rızâlarıyla muhtârları olan evlâd-ı vâkıfdan mezbûrân es-Seyyid Mehmed Emin Efendi ve Molla İsmail’e iştirâken meşrûtiyet üzere tevcîh ve yedlerine başka başka berât-ı âlîşân sadaka ve ihsân buyrulmak recâsına İstanbul Mahkemesi’nden huzûr [-ı âlîlerine i‘lâm olundu.] Fî 14 Ca sene 1237