İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 287 Hüküm no: 263 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akata bt. Mosis ile Karabet v. Semadan’ın alacak davasında sulh oldukları 300 guruşa sulh Muhrec olmuşdur fî-18 min Ca sene 1250 Def‘a ihrâc şüd fî-8 Za sene 1250 Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mastûrü’l-ism mukaddemâ francalacı esnâfından olan Karabet v. Semadan nâm zimmî bi’d-defa‘ât Çarşamba günleri arz odasında huzûr-ı hazret-i Sadâret-penâhîde ma‘kūd meclis-i şer‘-i enverde sâhibe-i arzuhâlde şahsı mu‘arrefe Akata bt. Mosis nâm Nasrâniye muvâcehesinde hâlâ ekmekçiler kethüdâsı Mehmed Efendi b. Ali ve sâbıkā ekmekçiler kethüdâsı es-Seyyid Mustafa Ağa b. es-Seyyid el-Hâc Mehmed Emin hâzır oldukları hâlde mahmiye-i İstanbul’da Kumkapı hâricinde vâki‘ ma‘lûmü’l-hudûd bir bâb fırancılacı fırını derûnunda mevcûde beyne’l-esnâf gedik tâ‘bir olunur fırancılacı âlât-ı lâzıme-i ma‘lûmesi yirmi sehm i‘tibâriyle beş sehmi gāibân ani’l-meclis Aleksan zimmî ile Şuşane Nasrâniyenin ve beş sehmi benim ve on sehmi mesfûre Akata Nasrâniyenin yedlerimizde mâlımız ve mülkümüz iken bundan akdem bi-kazâillâhi te‘âlâ vukū‘ bulan Kumkapı harîkinde zikr olunan fırancılacı fırını dahi muhterik oldukda mesfûre Akata Nasrâniye bana fırın-ı mezkûrun binâsına ve âlât-ı lâzımesini tanzîme her ne kadar meblağ sarf olunur ise mâlından sarf ile ba‘dehû hisse-i mezkûreme isâbet eden mikdârı ile bana rücû‘ eyle deyü bi-şartü’r-rücû‘ bana emr edüp ben dahi zikr olunan fırancılacı fırınının binâsına ve âlât-ı lâzımesinin tanzîmine mâlımdan ber-mûceb-i defter-i müfredât on iki bin guruş sarf edüp ba‘dehû âlât-ı lâzıme-i mezkûreden her birimiz hisselerimizi âhara bey‘ dahi etmemizle masrûfum olan meblağ-ı mezbûrdan i‘tibâr-ı merkūm üzere mesfûr Akata Nasrâniyenin on sehm hissesine iktizâ eden altı bin guruşu ber-vech-i muharrer bi-şartü’r-rücû‘ emrine binâen mersûme Akata Nasrâniyeden taleb ederim deyü mesfûrenin inkârına mukārin tasaddî eylediğim da‘vâmdan bâ-vesâtet-i muslihîn mersûme Akata Nasrâniye ile an inkâr üç yüz guruş üzerine ba‘de akdi’l-musâlaha ve’l-kabûl bedel-i sulh-i merkūm üç yüz guruşdan mâ‘adâ ziyâde müdde‘âma ve bi’l-cümle husûs-ı mezkûra ve işbu târih-i i‘lâma gelince sâir cemî‘ hukūk-ı şer‘iyyeye müte‘allika multaka âmme-i de‘âvî ve mutâlebât ve kâffe-i eymân ve muhâsemâtdan şürût-ı müfsideden ârî ibrâ-i âmm-ı sahîh-i şer‘î ile her birimiz âharın zimmetini kabûlü hâvî ibrâ ve iskāt ve bu vechile külliyen kat‘-ı nizâ‘ eyledik deyü mesfûr Karabet zimmînin ikrâr u i‘tirâfını mersûme Akata Nasrâniye tasdîk ve ibrâdan müstesnâ bedel-i sulh-i merkūm üç yüz guruşu mersûm Karabet zimmîye edâ ve teslîmiyle ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 20 C sene 1237