İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 293 Hüküm no: 269 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Veliyüddin’in Hadice Hatun bt. Abdurrahim aleyhine açtığı davasının reddedildiği Vakfiye mu‘ârazadan men‘ Mukābele şüd Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden zâtı mu‘arrefe Sâliha Hatun bt. el-Hâc Veliyüddin İstanbul mahkemesinde meclis-i şer‘-i enverde hâmiş-i arzuhâlde muharrer derkenâr nâtık olduğu üzere zikri âtî bir bâb vakıf menzile bi’l-icâreteyn bâ-temessük-ı mütevellî mutasarrıfe olan kezâlik zâtı mu‘arrefe Hadice Hatun bt. Abdurrahim muvâcehesinde zîr-i nezâret-i dâ‘iyânemde olan evkāfdan ashâb-ı hayrâtdan merhûm İmâm Ali Efendi Vakfı’nın mütevellîsi es-Seyyid Mehmed Râşid Efendi b. es-Seyyid Mehmed Derviş Efendi tarafından mürsel vekîli es-Seyyid Mehmed Muhyiddin Efendi b. Mehmed hâzır olduğu hâlde vakf-ı merkūm müsakkafâtından İstanbul’da Hocapaşa kurbünde Mihrab Sokağı nâm mahalde vâki‘ hâlâ benim dahi sâkine olduğum ma‘lûmü’l-hudûd bir bâb menzilin mukaddemâ dört sehm i‘tibâriyle üç sehmine mutasarrıfe olan gāibetü ani’l-meclis Emine Hatun menzil-i mezkûrun i‘tibâr-ı merkūm üzere bir sehmini sana fâriğa olurum dedikde ben dahi hisse-i mezkûrenin bedel-i ferağı olmak üzere mâlımdan gāibe-i mezbûreye altı yüz guruş def‘ ve teslîm edüp lâkin gāibe-i mezbûreyi hisse-i mezkûreyi mütevellî izniyle bana fâriğa olmayup âhara fâriğa oldukda tedâvül-i eydî ile hâlâ mezbûre Hadice Hatun mecmû‘-ı menzil-i mezkûru zabt etmekle suâl olunup gāibe-i mezbûrenin bana fâriğa olacağı hisse-i mezkûreyi bana fâriğ yâhud gāibe-i mezbûreye medfû‘um olan meblağ-ı merkūm altı yüz guruşunu mâlından bana vermek üzere mezbûre Hadice Hatun’a haber olunsun deyü takrîr-i meşrûhu üzere bu mertebe ile tasaddî eylediği da‘vâsı meşrû‘a ve iltifâta şâyân olmayup ol vechile mezbûre Hadice Hatun’a suâl dahi teveccüh etmediği müdde‘iye-i mezbûreye tefhîm ve da‘vâ-yı mezkûresiyle mezbûre Hadice Hatun’a bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 28 Ca sene 1237