İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 294 Hüküm no: 270 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Regaib kandilinde cami ve mescitlerin aydınlatılması Sübût-ı leyle-i Regāib İstanbul Kādısı fazîletlü efendi İşbu i‘lâmınız rikāb-ı kamer-tâb-ı hazret-i hilâfet-penâhîye arz ile meşmûl-i enzâr-âsâr-ı cenâb-ı Padişâhî olmağla mûcebince leyle-i mezkûrede îkād-ı kanâdil olunması husûsu iktizâ edenlere tenbîhe mübâderet eyleyesin deyü buyruldu Dergâh-ı âli-i gerdûn-nâtıka arz-ı dâ‘î-i bî-tâkalarıdır ki İşbu sâl-ı pür-şeref sene seb‘a ve selâsin ve mi’eteyn ve elf şehr-i Recebi’l-ferdi gurresi rü’yet ile sâbit olmayup ancak gurre-i Cemâziyelâhire yevm-i Cuma’dan idüğü da‘vâ-yı sahîha-i şer‘iyye zımnında ber-rü’ye şâhideyn-i mu‘âdileyn şehâdetleriyle vech-i vecih-i şer‘î üzere sâbite olduğuna binâen tekmîl-i selâsin ile şehr-i mübârek-i Recebi’l-ferdin ibtidâsı işbu yevm-i ehaddan mazbût ve altıncı Cuma gecesi leyle-i Regāib olup leyle-i mübâreke-i merkūmede minârât-ı cevâmi‘ ve mesâcid îkād-ı kanâdil ile tezyîn buyrulmak kā‘ide-i mer‘iyye-i Devlet-i aliyye ve dîdene-i kadîme-i saltanat-ı seniyyeden olmağla ol bâbda tenbîhi hâvî fermân-ı cihân-metâ‘-ı vâcibü’l-ittibâ‘ları sudûru re’y-i âlîlerine menût idüğü İstanbul Mahkemesi’nden atebe-i ulyâlarına i‘lâm olundu. Fî-gurre-i B sene 1237