İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 307 Hüküm no: 283 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Seyyid Mustafa Ağa b. Ahmed’in malik olduğu kasap gediğinin küçük oğlu Ahmed’e intikal ettiği Kasab esnâfından medyûnen fevt olanların gedikleri celeb tâifesinden olan düyûnunu edâya müte‘ahhid olmağla bir buçuk gediği sagīre ba‘de’l-intikāl temessük i‘tâsı Ma‘rûz-ı dâ‘î [-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân Sultan Abdülhamid Han aleyhi’r-rahmetü ve’l-gufrân hazretlerinin efkāf-ı şerîfleri mülhakātından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden dördüncü selhhâneye merbût mahrûse-i Galata’da Kulekapısınde vâki‘ ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur vakf-ı âlât-ı lâzıme-i ma‘lûme ile beşinci selhhâneye merbût yine mahrûse-i Galata’da Ketehorta nâm mahalde Kamer Hatun Mahallesi’nde vâki‘ ma‘lûmü’l-hudûd bir bâb kasab dükkânı derûnunda mevcûde kezâlik gedik tâ‘bir olunur âlât-ı lâzıme-i ma‘lûmenin nısfı iki kıt‘a mütevellî temessükleri mantûklarınca kasab Sarrac es-Seyyid Mustafa Ağa b. es-Seyyid Ahmed’in tasarrufunda iken bundan akdem vefât ettikte mutasarrıf olduğu sâlifü’z-zikr bir buçuk gedik âlâtı sulbî sagīr oğlu es-Seyyid Ahmed’e âdiyen intikāl edüp lâkin bu makūle kasab esnâfından medyûnen fevt olanların gedikleri celeb tâifesinden olan düyûnunu edâya müte‘ahhid olan kimesneye bi’l-müzâyede bedel-i misliyle kethüdâ ve nizâm ustaları ma‘rifetleriyle verilip edâ-yı deyn etdirilmek nizâmları şürûtundan olduğuna binâen zikr olunan bir buçuk kasab gediği âlâtı dahi ber-vech-i muharrer kethüdâ ve kasab ustaları ma‘rifetleriyle bedel-i misliyle âhara verilip ashâb-ı arzuhâl celeb tâifesinden yaftalarıyla olan deynleri edâ ettirilmek üzere kasabbaşı efendi bendleri i‘lâm etmek sâdır olan fermân mûcebince hâlâ Yedikule kasablar kethüdâsı el-Hâc Hasan Ağa b. el-Hâc Osman ve Eğrikapu kassablar kethüdâsı el-Hâc Osman Ağa ve Yedikule kasab ustalarından el-Hâc İbrahim Ağa ve el-Hâc Ali Ağa ve Sultan Bâyezidli Hasan Efendi ve Mimarlı Mehmed Ağa ve Topkapılı İsmail Ağa ve Edirnekapılı İbrahim Ağa ve Kasımpaşalı Emir Mustafa ve Tunabaş el-Hâc Hasan Ağa ve Kasımpaşalı Veli Ahmed Ağa ve Salıpazar Ali Çavuş ve Alâiyyeli Mustafa Çavuş ve Kumandan İsmail Ağa nâm kimesneler ve sâirleri hâzır oldukları hâlde Yedikule’de vâki‘ esnâf-ı merkūmenin lonca odasında mahallerde zikr olunan bir buçuk gedik âlâtını ba‘de’l-müzâyede üç bin elli guruşda müteveffâ-i mezbûrun kayınpederi ve sagīr-i mezbûr es-Seyyid Ahmed’in min-kıbeli’l-üm ceddi ve vasîsi el-Hâc Abdurrahman Ağa b. Ali üzerinde karar eylediği ve ziyâde ile tâlib-i âhar olmadığını kethüdâ-yı merkūm meclis-i şer‘de ba‘de’l-inhâ merkūm el-Hâc Abdurrahman Ağa zikr olunan bir buçuk gedik âlâtını bi’l-vesâye merkūm el-Hâc Hasan Ağa’ya ba‘de’l-ferağ şürût-ı nizâmları üzere merkūm el-Hâc Hasan Ağa’dan dahi kendi tefevvüz edüp ol vechile mezbûr el-Hâc Abdurrahman Ağa müteveffâ-i mezbûrun ashâb-ı arzuhâl kıvırcık ve Karaman ağnâmı celeblerine yedlerinde olan yâfteleri mûcebince zimmetinde olan ma‘lûmü’l-mikdâr düyûnunu sagīr-i mezbûrun ba‘de’l-bülûğ icâzetine mevkūfen her birine hâlâ edâya ve hisse tevzî‘ine kethüdâ ve ustaları ma‘rifetleriyle tamamen ahz etmek üzere ba‘de’t-ta‘ahhüd zikirleri mürûr eden bir buçuk gedik âlâtı müteveffâ-i mezbûrdan oğlu sagīr-i merkūma ba‘de’l-intikāl bi’l-vesâye âhara ferağ ile kendi tefevvüz etmeğin tasarrufuna izni hâvî taraf-ı vakıfdan temessük i‘tâsı istid‘âsında olduğu İstanbul Mahkemesi’nden huzûr-ı âlîlerine i‘lâm olundu. Fî 3 Ca sene 1237