İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 308 Hüküm no: 284 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meşin ve kavaslanın yüksek fiyatla debbağ esnafına satışının yasaklandığı Meşin ve kavaslayı gālî bahâ ile esnâfına bey‘inin men‘i Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen işbu arz ve mahzar ve derkenârlara nazar olundukta vilâyet-i Anadolu’da Timurcu kazâsında kâin debbâğ esnâfının havâyic-i zarûriyelerinden olup ba‘zı kurâlarında hâsıl olan palamudun râyici üzere ahz ve iştirâlarına ba‘zı muhtekir taraflarından müdâhale ve mümâna‘at olunup ve esnâf-ı merkūme yedlerinde bulunan tiftiği dahi müşterisine satdırdıklarını beyân ile o makūle palamudun esnâf-ı merkūme kendi amellerine vefâ edecek mikdârı olmadıkça kaza-yı âhardan kimesne vaz‘-ı yed etmemek ve yedlerinde bulunan tiftiği esnâflarından mu‘temed bir kimesne bey‘ine âhardan mümâna‘at olunmamak bâbında fermân-ı âlîşân sudûrunu istid‘â etmiş oldukları mefhûm-ı arz ve mahzardan müstebân olup fi’l-hakīka debbâğ esnâfının i‘mâl eyledikleri kavasla ve meşinin cüz-i a‘zamı olan palamudun esnâf-ı merkūme almadıkça kavasla ve meşin i‘mâl eylemeyüp mağdûr ve mütezarrır olacakları zâhir olmağın bu sûretle tiftik bey‘i içün olan istid‘âlarından sarf-ı nazar ile ancak kazâ-i merkūm kurâsında hâsıl olan palamudun belde-i merkūmede kâin debbâğ esnâfına dahi eşedd-i lüzûmu var iken esnâf-ı merkūme amellerine vâfî almadıkça muhtekir ve mâr ve dermâz …? makūlelerinin iştirâ edüp Âsitâne-i aliyyenin gayrı mahallere nakl [58a] yâhud cem‘ edüp ba‘dehû esnâf-ı merkūmeye gālî bahâ ile bey‘leri mahallinde men‘ ve def‘ olunmak bâbında fermân-ı âlîşân sudûru muktezâ-yı maslahat idüğü İstanbul Mahkemesi’nden huzûr-ı âlîlerine i‘lâm olundu ol bâbda emr ve fermân hazret-i veliyyü’l-emrindir. Fi’l-yevmi’s-sâlis min-Recebi’l-ferd sene seb‘a ve selâsin ve mi’eteyen ve elf.