İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 309 Hüküm no: 285 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Metro v. Nikola’nın, Mihal v. Nikola’ya olan borcunun tecil edildiği 1.010.036 guruş hüküm Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâlde mastûrü’l-ism Sebzeci Mihal v. Nikola nâm zimmî bi’t-terâzî du‘âhânemizde ma‘kūd meclis-i şer‘-i enverde hâmiş-i arzuhâlde mastûr derkenârda tahrîr olunduğu üzere zikri âtî deyni içün mahbûs olan sebzeci Metro v. Nikola nâm zimmî muvâcehesinde bin iki yüz otuz altı senesi Saferi’l-hayrının üçüncü günü târihiyle müverrah bir kıt‘a i‘lâm-ı şer‘î mantûkunca mersûm Metro zimmî zimmetinde cihet-i deyn-i şer‘îden mahkûmun-bih alacak hakkım olan bin iki yüz otuz altı guruşun yüz guruşunu yine sene-i mezbûre Cemâziyelâhiresinin yirmi yedinci günü târihiyle müverrah diğer bir kıt‘a i‘lâm-ı şer‘î mantûkunca peşînen ve mâ‘adâsı olan bin yüz otuz altı guruşunu dahi sene-i mezbûre Recebi’l-ferdi gurresinden on beş ay on yedi gün tamamına değin beher şehr yetmiş beşer guruş verüp edâ etmek üzere mesfûr Metro zimmîyi te’cîl ve taksît etmişidim lâkin meblağ-ı mezbûr bin iki yüz otuz altı guruşun ancak yüz guruşunu mersûm Metro zimmî bana edâ ve teslîm edüp mâ‘adâsı olan bin yüz otuz altı guruşunu hâlâ edâ edememekle zimmetinde bâkī hakkım olup lâkin meblağ-ı merkūmu ber-vech-i muharrer hâlâ edâya kudreti olmamağla meblağ-ı bâkī-i merkūm bin yüz otuz altı guruşun üç yüz otuz altı guruşunu işbu târih-i i‘lâm şehri gāyetinde ve bâkī sekiz yüz guruşunu târih-i i‘lâm senesi şehr-i Recebi’l-ferdi gurresinden beher şehr altışar guruşdan on altı ay tamamına değin bana edâ etmek üzere mesfûr Metro zimmî istimhâl eylediğinde ben dahi rızâmla ber-vech-i muharrer imhâl eyledim deyü eylediği takrîrini mesfûr Metro zimmî tasdîk ve meblağ-ı bâkī-i merkūm bin yüz otuz altı guruş zimmetinde deyni olduğunu tâyi‘an ve kat‘iyyen ikrâr u i‘tirâf ve ber-vech-i muharrer müddet-i mezkûre tamamına değin edâya ta‘ahhüd eylediği İstanbul Mahkemesi’nden huzûr-ı âlîlerine i‘lâm olundu. Fî 12 Ca sene 1237