İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 310 Hüküm no: 286 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahruh Bey b. Alâüddevle Bey zaviyesi tevliyetinin nısf hissesinin Halil Bey b. İbrahim Bey’in vefâtıyla oğlu Mehmed Bey’e tevcîhi Bir derece dûn olduğu zâhir iken vakfiyeyi tevcîhi tehîr istid‘âsı iltifât olmamağla Ma‘rûz[-ı dâ‘î-i devlet-i aliyyeleridir ki] İşbu arz ve derkenâra nazar ve mütâla‘a olundukta Sivas ve Maraş ve gayrıda vâki‘ merhûm Alâüddevle Bey ve Şahruh Bey Câmi‘-i Kebîri ve Süleymanlu-yı sagīr kazâsına tâbi‘ Sırçalu’da vâki‘ merhûm Şahruh Bey b. Alâüddevle Bey Zâviyesi ve kalfalarının tevliyetlerine bâ-berât-ı âlîşân iştirâken evlâd-ı vâkıfdan batn-ı evvelde derecede müsâvî Halil Bey b. İbrahim Bey ve Çerkes Mehmed Bey b. Hasan Bey meşrûtiyet üzere mutasarrıflar iken merhûm Halil Bey fevt olmağla nısf hissesini mahlûlünden derecesinde müsâvî ve mukaddemâ batn-ı evvelde olduğu ber-mûceb-i derkenâr mütehakkık olan şerîki mezbûr Çerkes Mehmed Bey kendüye tevcîh istid‘â eylediği sûretde istid‘âsına i‘tibâr olunmayup müteveffâ-i mezbûrun oğlu gelince nısf hisse mezbûr Mehmed Bey’e tevcîhi tehîr olunmak üzere müteveffâ-i mezbûr Halil Bey’in oğlu Mehmed Emin Bey istid‘â eylediği meâl-i i‘lâmdan müstebân olup bu sûretde derkenârda zikr olunduğu üzere merkūm Çerkes Mehmed Bey müteveffâ-i mezbûr Halil Bey ile batn-ı evvelde derecede müsâvî evlâd-ı vâkıfdan idüğü mukaddemâ müteveffâ-i mezbûrun hayâtında tarafından vekîli oğlu merkūmun ikrârıyla mütehakkık ve kendi hâlâ merkūmdan bir derecede dûn olduğu zâhir iken ber-vech-i muharrer tehîr-i istid‘âsına iltifât olunmamak iktizâ eylediği imtisâlen li’l-emri’l-âlî İstanbul Mahkemesi’nden huzûr-ı âlîlerine i‘lâm olundu. Fî 8 Ca sene 1237