İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 310 Hüküm no: 287 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sebzeci İsmail Efendi b. Ahmed’in, Tersâne-i âmire için verilen imdadiye ve tekâlif-i sâireyi ödeyeceğini taahhüt ettiği Bostan-ı mezkûr içün beher seneden 75 guruş vermeğe ta‘ahhüd Ma‘rûz[-ı dâ‘î-i devlet-i aliyyeleridir ki] Ashâb-ı arzuhâl Âsitâne-i aliyyede vâki‘ bahçıvan tâifesinin Topkapı kolu yiğitbaşısı Yani v. Yorgo ve ustalarından Simyon v. Mıgırdıç ve Üstüyan v. Yuvan ve İstavri v. Todori ve Ostiviko v. Marko nâm zimmîler kethüdâları es-Seyyid Süleyman Ağa b. es-Seyyid el-Hâc İsmail nâm kimesne hâzır olduğu hâlde meclis-i şer‘-i hatîrde derûn-ı arzuhâlde mezkûrü’l-ism kuzâtdan İsmail Efendi b. Ahmed nâm kimesne muvâcehesinde bâ-evâmir-i aliyye Tersâne-i âmirede istihdâm içün vakit ve hâle nazaran bahçıvan tâifesinden beher yevm müretteb olan ma‘lûmü’r-ruûs amelenin gayr-ez ücret-i mîrî iktizâ eden imdâdiyeleri ve tekâlif-i sâire içün Topkapı kulu tâ‘bir olunur otuz dört kıt‘a bahçelerden ibâret olan bahçıvan tâifesinin beher mâh verdikleri mebâliğ her birinin ma‘mûriyetlerine nazaran ve mülkleri olan gediklerinin kıymetlerine göre beynlerinde ta‘dîl ve tesviye şürûtuna ri‘âyet olunarak vech-i lâyıkı üzere tarh ve tahmîl ve her biri hissesine isâbet eden mikdârı cânib-i Tersâne-i âmire içün kabza-i memûra edâ ve îfâ edegelmeleriyle merkūm İsmail Efendi dahi zikr olunan otuz dört kıt‘a bahçelerden İstanbul’da Molla Gürânî Mahallesinde vâki‘ el-yevm sebzevâtzer olunup derûnunda üç gedik i‘tibâriyle gedik ve mülküne mâlik ve mutasarrıf bir bâb kebîr bostana tarh ve tahmîl olunan hisse-i ma‘lûmesini vermemekle ber-vech-i muharrer ta‘dîl ve tesviye şartıyla zikr olunan bostana isâbet eden mikdârı vermek üzere merkūm İsmail Efendi’ye tenbîh olunmak murâdımızdır dediklerinde ba‘de’t-tasdîk mezbûr İsmail Efendi mâlik ve mutasarrıf olduğu bostan-ı mezkûr içün rızâsıyla fîmâ ba‘d işbu târih-i i‘lâmdan beher şehr altışar guruş onar paradan cem‘an senede yetmiş beşer guruş vermek üzere ta‘ahhüd eylediğinde esnâf-ı merkūmûn dahi râzılar olup ta‘ahhüdünü kabûl ve bu cihetle kat‘-ı nizâ‘ eyledikleri İstanbul Mahkemesi’nden huzûr [-ı âlîlerine i‘lâm olundu.] Fî-gurre-i Receb sene 1237