İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 311 Hüküm no: 288 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divrik’te Balaban Abdullah vakfı tevliyetinin Seyyid Ahmed Necib Halîfe’ye tevcihi Divrik’te Balaban Abdullah vakfının berâtı tevcîhi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen arzuhâl ve derkenâr-ı mezkûr Divriği’de vâki‘ Balaban b. Abdullah Evkāfından Oramki karyesi ….? mâlikânesi vakfının humus sehm ile tevliyetine bâ-berât-ı âlîşân meşrûtiyet üzere mutasarrıf olan aslah-ı erşed-i evlâd-ı vâkıfdan Mehmed Halîfe veledeş fevt olmağla müteveffâ-i mezbûrun sulbî kebîr oğlu sâhib-i arzuhâl es-Seyyid Ahmed Necib Halîfe dâ‘îleri aslah-ı erşed-i evlâd-ı vâkıfdan ve tevliyet-i mezkûreye kendiden gayrı müstehak olmamağla tevliyet-i mezkûre zikr olunan humus sehm ile şart-ı vâkıf üzere kendüye tevcîh buyrulmak bâbında meclis-i şer‘de takrîr ve istid‘â ettikte merkūm es-Seyyid Ahmed Necib Halîfe mütevellî müteveffâ-i mezbûrun sulb-ı sahîh oğlu olup bi’l-cümle takrîr-i meşrûhu vâkı‘a mutâbık ve nefsü’l-emre muvâfık idüğü erbâb-ı vukūfdan el-Hâc Mustafa Ağa b. Osman ve Mustafa Ağa b. Ömer ve es-Seyyid Hayrullah Efendi b. es-Seyyid İbrahim ve es-Seyyid Mustafa Efendi b. el-Hâc Mehmed nâm mevsûku’l-kelâm bî-garaz Müslimîn alâ-tarîkı’ş-şehâde haberleriyle zâhir ve mütehakkık olmağın mûcebiyle tevliyet-i merkūme humus sehm ile müteveffâ-i mezbûr Mehmed Halîfe Veledeş’in mahlûlünden sulb-ı sahîh oğlu ve aslah-ı erşed-i evlâd-ı vâkıfdan sâhib-i arzuhâl mezbûr es-Seyyid Ahmed Necib Halîfe’ye meşrûtiyet üzere tevcîh ve yedine berât-ı şerîf-i âlîşân sadaka ve ihsân buyrulmak iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 15 Receb sene [1]237