İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 321 Hüküm no: 298 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki yağcı dükkânı gediğinin Ali Yazıcı b. Mehmed üzerindeki kaydı terkin edilerek Seyyid Ebûbekir b. Süleyman ismine kaydedildiği Galata’da yağcı gediği başmuhâsebeden sûret istid‘âsı Ma‘rûz-ı dâ‘î [-i devlet-i aliyyeleridir ki] Sâhib-i arzuhâl es-Seyyid Ebûbekir b. Süleyman nâm kimesne meclis-i şer‘-i enverde kendi nefsinden asıl ve vâlidesi Hadice Hatun bt. Hüseyin tarafından husûs-ı âtîde vekîl-i müseccel-i şerîsi Galata yağkapanı tüccârından ve hâlâ kapan-ı merkūm nâzırı vekîli Süleyman Ağa b. el-Hâc Abdurrahman hâzır olduğu hâlde hâmiş-i arzuhâlde mastûr derkenâr nâtık olduğu üzere mahrûse-i Galata’da makaracılar kapısı dâhilinde bir tarafdan Gürcü el-Hâc Hasan dükkânı ve bir tarafdan Kırımî el-Hâc Ömer Ağa dükkânı ve bir tarafdan tarîk-i âm ile mahdûd bir bâb yağcı dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmeye mukaddemâ i‘tâ buyrulan bir kıt‘a sûret mûcebince derkenârda ismi mezkûr tüccârdan el-Hâc Ali Yazıcı b. Mehmed nâm kimesne mukaddemâ mâlik ve dükkân-ı merkūmun mülküne dahi ashâb-ı hayrâtdan Vezîriazâm-ı esbak merhûm Merzifonî Karamustafa Paşa Vakfı müsakkafâtından olmağla bâ-re’y-i mütevellî icâreteyn ile mutasarrıf iken merkūm el-Hâc Ali Yazıcı dükkân-ı merkūmu hâzır-ı mezbûr Süleyman Ağa’nın li-ebeveyn er karındaşı Derviş Hüseyin nâm kimesneye bin iki yüz yirmi yedi senesi Rebî‘ülevveli gurresinden bâ-re’y-i mütevellî ferağ ve tefvîz ve derûnunda mevcûde gedik tâ‘bir olunur âlât-ı lâzıme-i mezkûreyi dahi semen-i ma‘lûm ve makbûza bey‘ ve teslîm edüp ol vechile merkūm Derviş Hüseyin dükkân-ı mezkûra bi’l-icâreteyn vakfiyet üzere zikr olunan gedik âlâtına mülk-i müşterâsı olarak mutasarrıf ve mâlik iken merkūm Derviş Hüseyin verâseti vâlidesi müvekkile-i mezbûre Hadice Hatun ile li-ebeveyn er karındaşı hâzır-ı mezbûr Süleyman Ağa’ya münhasıra olduğu hâlde bundan akdem bilâ-veled fevt oldukda dükkân-ı merkūm mahlûl ve cânib-i vakf-ı mezkûra âid olmağın dükkân-ı mezkûru müteveffâ-i merkūmun vâlidesi vârise-i müvekkile-i mezbûre Hadice Hatun işbu yedimde olan mütevellî temessükü hâmişinde tahrîr olunduğu üzere mu‘accele ve müeccele-i ma‘lûme ile bin iki yüz otuz senesi Muharremi’l-harâmının yirmi yedinci günü taraf-ı vakıfdan istîcâr ve tefevvüz edüp ol vechile dükkân-ı merkūma müstekilleten müvekkile-i mezbûre Hadice bi’l-icâreteyn ve derûnunda mevcûde gedik âlât-ı lâzıme-i mezkûresine oğlu hâzır-ı mezbûr ile iştirâken mülk-i mevrûsları olarak mutasarrıfe ve mâlikler iken müvekkile-i mezbûre Hadice Hatun dükkân-ı mezkûru müstakilleten bin iki yüz otuz bir senesi Zilhicceti’ş-şerîfesi gurresinde bâ-re’y-i mütevellî bana ferağ ben dahi tefevvüz ve kabûl eylediğimde derûnunda mevcûde sâlifetü’z-zikr gedik âlât-ı lâzımesini dahi tarafeynden bi’l-îcâb ve’l-kabûl bâtten ve sahîhan semen-i ma‘lûm ve makbûza oğlu hâzır-ı mezbûr ile ma‘an her biri bi’l-verâse bana bey‘ ve temlîk ve teslîm ben dahi iştirâ ve kabz ve kabûl edüp ol vechile dükkân-ı merkūm bâ-re’y-i mütevellî bi’l-icâreteyn tasarrufumda ve zikr olunan gedik âlât-ı lâzıme-i ma‘lûmesi mülk-i müşterâm olup yedimde sûret olmamağla zikr olunan gedik âlâtı irs ve şirâ ile tedâvül olunarak el-yevm mülk-i müşterâm idüğü asıl ve vekîl hâzır-ı merkūmdan ve sâir erbâb-ı vukūfdan tahkīk buyrulup zikr olunan gedik âlâtının mukaddemâ el-Hâc Ali Yazıcı ismine olan kayd-ı atîki kaleminden ref‘ ve terkīn ve benim üzerime kayd ile ismime tasrîhan müceddeden yedime bir kıt‘a sûret i‘tâ buyrulmak matlûbumdur dedikde merkūm es-Seyyid Ebûbekir’in bi’l-cümle kelimât-ı meşrûhası vâkı‘a mutâbık idüğü hâzır-ı mezbûr Süleyman Ağa’nın bi’l-verâse ve bi’l-vekâle bi’l-muvâcehe ikrâr ve tasdîki ve kapan-ı merkūm tüccârından el-Hâc Mehmed Ağa b. el-Hâc İbrahim ve Ahmed Ağa b. Mehmed nâm mevsûku’l-kelîm bî-garaz kimesnelerin alâ-tarîkı’ş-şehâde haber vermeleriyle zâhir ve mütehakkık olmağın bu takdîrce zikr olunan gedik âlâtının merkūm el-Hâc Ali Yazıcı ismine olan kayd-ı atîki kaleminden ref‘ ve terkīn ve mezbûr es-Seyyid Ebûbekir’in üzerine kayd ile tafsîl-i mezkûr derciyle ismine tasrîhan yedine müceddeden sûret i‘tâ buyrulmak iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî 22 B sene 1237