Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 308 Hüküm no: 329 Orijinal metin no: [50b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Niko’nun evini Mustafa Beşe b. Abdullah’a bey‘ bi’l-istiğlâl yoluyla sattığı Mahmiye-i İstanbul’da Tahtaminâre mahallesinde sâkin Yorgi v. Niko meclis-i şer‘-i şerîf-i enverde işbu bâ‘isü’l-vesîka Mustafa Beşe b. Abdullah muvâcehesinde ikrâr ve takrîr-i kelâm edip akd-i âtî sudûruna değin yedimde mülküm olup mahalle-i mezbûrede vâki‘ bir tarafdan terzi İstemaki nâm zimmî mülkü ve bir tarafdan Harbeci Yusuf mülkü ve bir tarafdan Hüseyin mülkü ve bir tarafdan tarîk-i âmla mahdûd fevkānî ve tahtânî iki bâb ve bir sofa ve bir tahtapûş ve bir kiler ve havluyu müştemil mülk menzilimi bi cümleti’t-tevâbi‘ ve’l-levâhık yüz elli esedî guruşa merkūm Mustafa Beşe[‘ye] bi tarîki’l-istiğlâl bey‘ ve teslîm [51a] ol dahi iştirâ ve kabûl ve tesellüm edip semeni olan meblağ-ı mezbûr yüz elli guruşu yedinden tamâmen ahz u kabz eylediğimden sonra mezbûr Mustafa Beşe menzil-i mezbûru gıbbe’t-tahliyye ve’t-tekābuz târih-i kitâbdan bir sene tamâmına değin her ayda elli akçeye olmak üzre bana îcâr ve teslîm ben dahi istîcâr ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mustafa Efendi b. Abdülhalim, Mustafa Beşe b. Muharrem, Hasan Çelebi b. Mustafa, Ahmed Beşe b. Mustafa, Osman b. Ali, Bayram b. Abdullah.