Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 308 Hüküm no: 330 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pireşkova v. Yorgi’nin Yorgi v. Nikola ve ortağından alacaklı olduğu Mahmiye-i İstanbul’da Eski Odalar kurbunda sâkin tüccâr tâifesinden işbu bâ‘isü’l-vesîka Pireşkova v. Yorgi nâm zimmî meclis-i şer‘-i şerîf-i enverde bahçevân tâifesinden Yorgi v. Nikola ve şerîki Nikol v. Andriye nâm zimmîler muvâcehelerinde üzerlerine da‘vâ ve takrîr-i kelâm edip mezbûrân Yorgi ve Nikola zimmetlerinde cihet-i deyn-i şer‘îden yüz kırk esedî guruş hakkım olmağın mezbûrâna suâl olunup meblağ-ı mezbûru [bana] edâya tenbîh olunmak matlûbumdur dedikde gıbbe’s-suâl mezbûrân Nikola ve Yorgi cevâblarında fi’l-hakīka müdde‘î-i mezbûru Pireşkova’ya cihet-i mezkûreden ber vech-i muharrer yüz kırk esedî guruş ale’l-iştirâki’s-seviy deynimiz vardır deyû bi tav‘ihâ ikrâr ve i‘tirâf etmeleriyle alâ mûcebi i‘tirâfihâ meblağ-ı mezbûr yüz kırk guruşu müdde‘î-i mezbûru Pireşkova’ya edâ ve teslîme mezbûrân Yorgi ve Nikola’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Hüseyin Beşe, Ali Çelebi b. Şaban, el-Hâc Osman Beşe, Hasan b. Abdullah, Mahmud b. Ömer.