İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 334 Hüküm no: 313 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İznik kazâsına bağlı Sülez köyündeki İbrahim ve Bolad çiftliği vakfının tevliyet ve gallesinin Seyyid Mehmed Emin Bey’e tevcihi İznik kazâsına tâbi‘ Sölez karyesinde çiftlik ve arâzinin tevliyet ve galle tevcîhi Ma‘rûz[-ı dâ‘î-i devlet-i aliyyeleridir ki] Ashâb-ı arzuhâlden kendi nefsinden asıl ve li-ebeveyn er karındaşı es-Seyyid Abdurrahim b. Mehmed Said b. Abdullah ile li-ebeveyn hâlesi Şerîfe Selime bt. Abdullah b. Abdullah ile taraflarından husûs-ı âtîde vekîlleri olduğu zât-ı mezbûreyi ârifân Ali Efendi b. Mehmed ve es-Seyyid İbrahim b. Süleyman nâm kimesneler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan es-Seyyid Mehmed Ârif b. el-mezbûr Mehmed Said meclis-i şer‘-i enverde zikri âtî vakıf arâzi ve çiftliğe bâ-berât-ı âlîşân mutasarrıf olan hâcegân-ı dîvân-ı hümâyûndan derûn-ı arzuhâlde ismi mezkûr es-Seyyid Mehmed Emin Bey b. İsmail Bey muvâcehesinde hâmiş-i arzuhâlde mastûr derkenâr nâtık olduğu üzere İznik kazâsına tâbi‘ Sülez nâm karyede vâki‘ İbrahim ve Bolad çiftliği demekle ma‘rûf arâzi evlâd ve evlâdda neslen ba‘de neslin ve batnen ba‘de batnin meşrûta vakıf olup evlâd-ı vâkıfdan vazîfe-i mu‘ayyene ile tevliyet ve gallesine mutasarrıf olan es-Seyyid Mustafa bundan akdem bilâ-veled fevt ve vakf-ı mezbûrun tevliyet ve gallesi mahlûl oldukda evlâd-ı vâkıf külliyen münkarız oldular deyü müteveffâ-i mezbûrun mahlûlünden bâ-arzuhâl istid‘âsıyla ecânibden müteveffâ mîr es-Seyyid İsmail b. el-Hâc Mehmed nâm kimesne bin iki yüz yirmi dört [64a] senesi Rebî‘ülevveli gurresinde kendüye tevcîh ve berât ettirdip ba‘dehû hayâtında bin iki yüz yirmi altı senesi Recebi’l-ferdinin on üçüncü günü târihiyle tevliyet ve galle-i merkūmeyi evlâd-ı vâkıfdan diyerek kendi kasr-ı yedinden sulbî oğlu mûmâ-ileyh es-Seyyid Mehmed Emin Bey’e tevcîh ve berât ettirmeğin ol vechile târih-i mezkûrdan berü mûmâ-ileyh es-Seyyid Mehmed Emin Bey tevliyet ve galle-i merkūmeyi ecânibden olduğu hâlde hilâf-ı inhâ ile şart-ı vâkıfa mugāyir fuzûlî zabt ve tasarruf edüp lâkin ben ve müvekkillerim mezbûrân es-Seyyid Abdurrahim ve Şerîfe Selime Hatun mücerred evlâd-ı vâkıfdan olmamızla tevliyet ve galle-i merkūmeyi mûmâ-ileyh es-Seyyid Mehmed Emin Bey’in üzerinde ref‘ ve bize tevcîh olunmak bi’l-asâle ve bi’l-vekâle matlûbumdur deyü takrîr-i meşrûhu üzere eylediği da‘vâsında evvelâ zikr olunan çiftlik ve arâzinin vâkıfları vâkıflar ile kendi ve müvekkilleri mezbûrânın beynlerinde olan vesâyit kimler idüğü tashîh ve beyâna muhtâc olduğu asıl ve vekîl-i merkūm es-Seyyid Mehmed Ârif’e ifâde ve tashîh ve da‘vâya havâle olundukta def‘a-i sânîye terâfû‘larında asıl ve vekîl-i merkūm es-Seyyid Mehmed Ârif çiftlik ve arâzi-i mezkûrenin vâkıfları ve vâkıflar ile benim ve müvekkillerim mezbûrânın beynimizde olan vesâyit kimler olduğu benim ve müvekkillerim mezbûrânın kat‘â ma‘lûmumuz değildir deyü ikrâr u i‘tirâf etmeğin ikrârı mûcebince mücerred evlâd-ı vâkıfdan olmak üzere beynlerinde olan vesâyiti zikr ve beyân etmeyerek bu mertebede eylediği da‘vâsı şer‘an mesmû‘a ve mu‘tebere olmayup ol vechile mûmâ-ileyh es-Seyyid Mehmed Emin Bey’e suâl dahi teveccüh etmediği ba‘de’t-tefhîm mûcebince müdde‘î-i asıl ve vekîl-i mezbûr es-Seyyid Mehmed Ârif da‘vâ-yı mezkûresiyle mûmâ-ileyh es-Seyyid Mehmed Emin Bey’e bî-vech-i şer‘î mu‘ârazadan men‘ olunduktan sonra mezbûr es-Seyyid Mehmed Ârif yine bi’l-asâle ve bi’l-vekâle meclis-i şer‘-i münîrde mûmâ-ileyh es-Seyyid Mehmed Emin Bey muvâcehesinde mûmâ-ileyh es-Seyyid Mehmed Emin Bey kat‘an li’n-nizâ‘ ve ref‘an li’l-husûme benimle müvekkillerim mezbûrâna mâlından nakden altı yüz guruş teberru‘ ve bana teslîm ben dahi yedinden bi’l-asâle ve bi’l-vekâle ahz ü kabz ve emriyle umûrumuza sarfla istihlâk etmemizle fîmâ ba‘d meblağ-ı müstehlek-i merkūma ve bi’l-cümle husûs-ı mezkûra müte‘allika her birimizin asâleten ve vekâleten âhar ile kat‘â da‘vâ ve nizâ‘ ve husûmetimiz yokdur deyü ikrâr ve tasdîkleri ba‘de’t-tescîl zikr olunan İbrahim ve Bolad Çiftliği demekle ma‘rûf arâzinin tevliyet ve gallesi kemâkân mûmâ-ileyh es-Seyyid Mehmed Emin Bey üzerinde ibkā olunup istihkâmen yedine berât-ı şerîf-i âlîşân sadaka ve ihsân buyrulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-selh-i C sene 1237