Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 309 Hüküm no: 331 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Ali’nin Ahmed Ağa b. Mustafa’nın vârislerine olan borcunun taksite bağlanması Medîne-i Ebâ Eyyûb-i Ensârî’de Câmi‘-i Kebîr mahallesi sükkânından iken bundan akdem vefât eden Ahmed Ağa b. Mustafa’nın evlâd-ı sıgārının ceddeleri ve vasîleri Rukiye Hanım bt. Abdullah tarafından husûs-ı âti’l-beyâna vekîl olduğu el-Hâc Abdullah b. Hasan ve Ahmed b. Mustafa şehâdetleriyle sâbit olan sıgār-ı mezbûrûnun vâlideleri Hatice bt. Abdullah nâm hâtun meclis-i şer‘-i şerîf-i enverde bâ‘isü hâze’l-kitâb Mahmud b. Ali mahzarında bi’l-vekâle ikrâr ve takrîr-i kelâm edip mezbûr Mahmud’un imzâ ve hatmini hâviye işbu temessükü nâtık olduğu üzre sıgār-ı mezbûrûna yüz yirmi esedî guruş vâcibü’l-edâ deyni olup lâkin hâlâ edâya kudreti olmamağla te’cîle tâlib olmağın müvekkilem vasiyy-i merkūm dahi meblağ-ı mezbûr her otuz günde beş yüz akçe vermek üzre târih-i kitâbdan sekiz yüz altmış gün tamâmına değin te’cîl ve taksît eyledikde merkūm Mahmud dahi kabûl ve vech-i meşrûh üzre meblağ-ı mezbûr yüz yirmi guruşu ecel-i mezkûr hulûlüne değin bi’t-tamâm edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’s-sâlis ve’l-ışrîn min Recebi’l-ferd li sene seb‘a ve tis‘în Şuhûdü’l-hâl: El-Hâc Mustafa b. Tevekkül, Mustafa Çelebi Ser-muhzırân, Ebûbekir b. Hüseyin Kethüdâ-yı muhzırân.