Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 309 Hüküm no: 332 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çavuş b. İbrahim’in Ayşe bt. Mehmed’de alacağı olduğu Mahmiye-i İstanbul’da Selvi mahallesinde sâkin bâ‘isü’l-kitâb Ahmed Çavuş b. İbrahim meclis-i şer‘-i şerîf-i enverde mahmiye-i mezbûrede Horhor çeşme kurbunda sâkine Ayşe bt. Mehmed nâm hâtun mahzarında üzerine da‘vâ ve takrîr-i kelâm edip mezbûr Ayşe zimmetinde cihet-i deyn-i şer‘îden altmış iki esedî guruş hakkım olup meblağ-ı mezbûre on dokuz guruş ile iki sümününü yedinden ahz u kabz edip kırk iki guruş ile on sümün bâkī kalmağla suâl olunup alıverilmesi meblağ-ı bâkī-i mezbûru dahi bana edâ ve teslîme mezbûre Ayşe Hâtun’a tenbîh olunmak matlûbumdur dedikde gıbbe’s-suâl mezbûre Ayşe Hâtun cevâbında fi’l-hakīka müdde‘î-i mezbûr Ahmed Çavuş’a ber vech-i muharrer cihet-i mezbûrdan bâkī kırk iki guruş ile on sümün zimmetinde lâzımü’l-edâ deyni olduğunu bi tav‘ihâ ikrâr ve i‘tirâf etmeğin alâ vechi i‘tirâfihâ [51b] meblağ-ı bâkī-i mezbûru dahi müdde‘î-i mezbûr Ahmed Çavuş’a edâ ve teslîme merkūme Ayşe Hâtun’a tenbîh olunup mâ vaka‘a ketb olundu. Fi’l-yevmi’r-râbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Hüseyin Çavuş el-Mübâşir, İbrahim b. Ahmed, Süleyman b. Receb, Mahmud b. Hasan.