İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 346 Hüküm no: 326 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firari Tanaş, Lamerd, Yano, Metro ve Semedyon Koco zımmilerin malik oldukları un değirmenin Seyyid Mustafa Ağa’ya satıldığı Uncu değirmeni Ma‘rûz-ı dâ‘î [-i devlet-i aliyyeleridir ki] Âsitâne-i aliyye ve bilâd-ı selâse-i mu‘azzama ve tevâbi‘lerinde kâin bi’l-cümle habbâz esnâfının kethüdâları Mehmed Efendi b. Ali meclis-i şer‘-i enverde esnâf-ı merkūmeden es-Seyyid Mustafa Ağa b. es-Seyyid el-Hâc Mehmed Emin muvâcehesinde kapan-ı dakīk tüccârından Hatîbzâde es-Seyyid el-Hâc Hasan Ağa b. Ali ve es-Seyyid el-Hâc Veliyüddin Ağa b. Ali ve Arpacı el-Hâc İbrahim Ağa b. Hasan ve Ellialtı el-Hâc Mustafa Ağa b. Mehmed ve Bağdâdlızâde İbrahim Ağa b. el-Hâc Mehmed Emin ve Kırımızâde es-Seyyid el-Hâc Musa Ağa b. el-Hâc İsmail ve Uncular kethüdâsı el-Hâc Mehmed Ağa b. el-Hâc İbrahim ve Habbâz Ali Usta b. Ömer hâzır oldukları hâlde mahrûse-i Galata’ya muzâfe İstinye nâhiyesine tâbi‘ Yeniköy’de vâki‘ Abacıoğlu değirmeni demekle ma‘rûf ma‘lûmü’l-hudûd altı horoslu bir bâb habbâz değirmeni ve ona merbût Abacıoğlu fırını demekle ma‘rûf ma‘lûmü’l-hudûd bir bâb habbâz fırını derûnunlarında mevcûde beyne’l-hiref gedik tâ‘bir olunur âlât-ı lâzıme-i ma‘lûmenin yirmi dört re’s bârgir i‘tibâriyle dokuz re’s bârgir hissesi habbâz usta Tanaş zimmînin ve on iki re’s bârgir hissesi habbâz usta Lamerd zimmînin ve üç re’s bârgir hissesi habbâz usta Yano zimmînin ve zikr olunan Yeniköy’de köybaşı değirmeni demekle ma‘rûf kezâlik ma‘lûmü’l-hudûd üç horoslu bir bâb habbâz değirmeni ve ona merbût köybaşı fırını demekle ma‘rûf bir bâb habbâz fırını derûnlarında mevcûde beyne’l-hiref gedik tâ‘bir olunur âlât-ı lâzıme-i ma‘lûmenin on iki re’s bârgir i‘tibâriyle sekiz re’s bârgir hissesi habbâz usta Metro zimmînin ve dört re’s bârgir hissesi habbâz usta Semedyon Koco nâm zimmînin yedlerinde mâlları olup zikr olunan fırınlar ve değirmenle i‘mâl ederler iken iştirâ ve kabz eyledikleri zehâir esmânından mesfûrûn Tanaş ve Lamerd ve Yano ve Metro ve Semedyon Koco nâm zimmîler cânib-i mîrîye yirmi dört bin dokuz yüz seksen yedi buçuk guruş ve kapan-ı dakīk tüccârına ber-mûceb-i defter-i müfredât yirmi üç bin on iki buçuk guruş ki cem‘an zimmetlerinde kırk sekiz bin guruş deynleri olduğu hâlde zikr olunan fırınlar ve değirmenleri terk ve firâr edüp gaybet-i münkatı‘a ile gāibler olmalarıyla Âsitâne-i aliyye ve bilâd-ı selâse ve tevâbi‘lerinde olan bi’l-cümle habbâz ve uncu esnâfının yedlerinde olan fırın ve değirmen gedikleri zehâyir esmânından cânib-i mîrîye ve tüccâra olan deynlerine mukābil olup bu sûretde medyûn oldukları hâlde firâr ve gaybet edüp yedlerinde olan gediklerini terk eden habbâz ve uncu esnâfının gedikleri habbâzân esnâfının kethüdâsı ve vasî ve kayyım nasb olunarak semen-i misilleriyle tâliblerine bey‘ olunup semenlerinden cânib-i mîrîye ve tüccâra olan deynleri edâ ettirmek bâ-fermân-ı âlî esnâf-ı merkūmenin mer‘î ve mu‘teber şürût-ı nizâmlarından olduğuna binâen husûs-ı mezkûr içün vasî ve kayyım nasb ve ta‘yîn olunduğumdan sonra zikr olunan altı horoslu Abacıoğlu değirmeni ve ona merbût Abacıoğlu fırını derûnlarında mevcûde yirmi dört re’s bârgir i‘tibâr olunan sâlifü’z-zikr gedik tâ‘bir olunur âlât-ı lâzıme-i ma‘lûme ile mârrü’l-beyân üç horoslu köybaşı değirmeni ve ona merbût köybaşı fırını derûnlarında mevcûde on iki re’s bârgir i‘tibâr olunan gedik tâ‘bir olunur âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin semen-i misillerinden ezyed olan kırk sekiz bin guruşa mezbûr es-Seyyid Mustafa Ağa’ya bey‘ ve temlîk ve teslîm ol dahi ber-vech-i muharrer iştirâ ve kabz ve kabûl edüp semenleri olan meblağ-ı merkūm kırk sekiz bin [67a] guruşun yedi bin guruşunu gāibûn-ı mesfûrûnun cânib-i mîrîye zimmetlerinde deynleri olan meblağ-ı mezbûr yirmi dört bin dokuz yüz seksen yedi buçuk guruşun ol mikdârına mahsûben ber-vech-i peşin cânib-i mîrîye edâ ve bâkīsi olan on yedi bin dokuz yüz seksen yedi buçuk guruşunu dahi işbu târih-i i‘lâmdan beher sene cânib-i mîrîye taksît ile biner guruş edâ etmek ve mâ‘adâ gāibûn-ı mersûmûnun tüccâr-ı merkūmûna deynleri olan meblağ-ı mezbûr yirmi üç bin on iki buçuk guruşunu dahi nizâmları vechile ceste ceste tüccâr-ı merkūmûna edâ etmek üzere mezbûr es-Seyyid Mustafa Ağa ta‘ahhüd etmekle fîmâ ba‘d zikr olunan iki bâb değirmen ve iki bâb fırın gedikleri olan âlât-ı lâzıme-i ma‘lûmede gāibûn-ı mesfûrûnun kat‘an alâka ve medhalleri kalmayup mezbûr es-Seyyid Mustafa Ağa’nın ber-vech-i muharrer şirâen mâlı ve mülküdür dediğini merkūm es-Seyyid Mustafa Ağa ba‘de’t-tasdîk zikirleri mürûr eden değirmenler ve fırınların gedikleri gāibûn-ı mesfûrûnun üzerlerinden ref‘ ve müşteri-i mezbûr es-Seyyid Mustafa Ağa ismine kaleminde mukayyed ile şürût-ı nizâmları üzere yedine sûret i‘tâ buyrulmak bâbında istid‘â-yı inâyet eylediği İstanbul Mahkemesi’nden huzûr [-ı âlîlerine i‘lâm olundu.] Fî 25 R sene 1237