İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 348 Hüküm no: 327 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’dan İstanbul’a getirilen koyunların kasap esnafına dağıtımı Lahm-ı ganem tevzî‘i Ma‘rûz-ı dâ‘î [-i devlet-i aliyyeleridir ki] Karaman ağnâmı celebânından olup bu def‘a Anadolu cânibinden Âsitâne-i aliyyeye ber-vech-i âtî ağnâm sevk eden Atçekenli el-Hâc Mehmed Ağa kezâlik celebân-ı merkūmûndan el-Hâc Hasan Ağa ve Deli Mehmed oğlu Osman ve Receb oğlu Halil ve İsmail nâm kimesneler hâzır oldukları hâlde hâlâ Yedikule kasablar kethüdâsı el-Hâc Hasan Ağa b. el-Hâc Osman muvâcehesinde Eğrikapu kasablar kethüdâsı vekîli el-Hâc Ali Ağa ve Yedikule kasab ustalarından el-Hâc İbrahim Ağa ve Hasan Ağa ve Şerîf Mehmed Ağa ve Kadıoğlu diğer Mehmed Ağa ve Eğrikapu ustalarından âhar Mehmed Ağa ve İbrahim Ağa ve sâirleri ile vilâyet-i Rumeli ve Bosna celebânından Arnavud Yakub Ağa ve İbrahim Ağa ve Zeynel Ağa ve Numan Ağa ve Battal Hüseyin ve Yunus ve sâye bölükbaşısı Ârif Ağa ve Salih Beşe ve Kocamustafa ve Sâyeli Hüseyin ve Yahya Ağa ve Yörük el-Hâc Mustafa ve Yörük Yusuf ve Yörük Osman ve Yörük Ali ve Kuşçu Osman nâm Müslimîn ve re‘âyâdan Çalıkoğlu Velko ve Kankooğlu Yorgi ve Kosti oğlu Yonco ve Tabanoğlu Raşiko ve Şoşaval ve Ustuyan ve Todori ve Doşko oğlu ve Debre ve Samakolu Angeliko ve Otluk karyeli Nanco ve Celeboğlu Üstüyo ve Matya ve Acınikooğlu Üstüyan nâm zimmîler kezâlik hâzır oldukları hâlde bu def‘a Anadolu cânibinden Âsitâne-i aliyyeye ben mâlımdan sevk ve tesyîr eylediğim dört yüz elli re’s ve karındaşım gāib ani’l-meclis el-Hâc Ahmed Efendi’nin mâlından sevk ve tesyîr eylediğim altı yüz re’s ve hâzır-ı mezbûr el-Hâc Hasan Ağa’nın sevk ve tesyîr eylediği bin re’s ve hâzır-ı mezbûr Veli Mehmed oğlu Osman’ın sevk ve tesyîr eylediği altı yüz re’s ve hâzır-ı mezbûr Celeboğlu Halil’in sevk ve tesyîr eylediği beş yüz elli re’s ve hâzır-ı mezbûr İsmail’in sevk ve tesyîr eylediği iki yüz re’s ki cem‘an sevk ve tesyîr eylediğimiz üç bin beş yüz karaman ağnâmımızın hâlâ hâssa kasabbaşısı dergâh-ı âlî kapıcıbaşılarından es-Seyyid el-Hâc Mustafa Ağa’nın inzımâm-ı re’y ve ma‘rifetleriyle lühûmun kuyruklarıyla ma‘an beher vakıyyesini otuz yedişer paraya ve yapağlı sakatlarını yirmişer paraya ve tula tâ‘bir olunur yapağısını sakatlarını onar paraya olarak sekiz gün Rumeli ve Bosna celebleri hâzirûn-ı merkūmûnun ve iki gün bizim ağnâmımızı esnâf-ı merkūmûna tevzî‘ ve ağnâm-ı mezkûrenin mikdâr ve fiyatını mübeyyin yaftalarını hîn-i tevzî‘den otuz bir gün mürûrunda biz teslîme kethüdâ-yı merkūm ve semenleri olan akçelerini elli bir gün tamamında bize edâya ve lühûmunun kuyruklarıyla ma‘an beher vakıyyesini narh-ı cârîsi üzere kırk paraya ibâdullâha beye esnâf-ı hâzirûn-ı mezbûrûn ta‘ahhüd ve ber-vech-i meşrûh sekiz gün Rumeli ve Bosna celebleri ağnâmı ve iki gün bizim ağnâmımız tevzî‘ olunmağa esnâf ve celebân-ı hâzirûn-ı merkūmûn râzılar olup tarafeynden her birimiz dahi âharın ta‘ahhüd ve rızâlarını kabûl eyledik dediklerini her biri tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 15 N sene [12]37