İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 349 Hüküm no: 328 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den İstanbul’a getirilen koyunların kasap esnafına dağıtımı Kasab Ma‘rûz-ı dâ‘î [-i devlet-i aliyyeleridir ki] Vilâyet-i Rumeli’nde vâki‘ Edirne ve Bosna ve Filibe ve Avratalan ve Otluk köyü caniblerinden bu def‘a Âsitâne-i aliyyeye kıvırcık ağnâmı celb eden Rumeli celebânından Acı Nikola oğlu Üstüyan ve Fileşko ve Sako ve Rado oğlu İlya ve Roşko oğlu Dobre ve Kızıl Sava ve Kosti oğlu Nevanco ve Todori oğlu Velko ve Celeboğlu Üstüyo ve Kulaksız oğlu Esiro ve Debrevî? Pretedori ve Kireoğlu Toycu ve Bazedoğlu? Nikola ve Eskordaoğlu Ketho ve Muşmula oğlu Üstüyan ve Kızanlıklı Kiho ve Otlukköylü Tenco ve Yanyalı Yanco ve Yılko …? ve Restonko? oğlu Yorgi ve İlyanider? ve Tencora? ve Deslar ve Gökoğlu Meso ve Gökoğlu Cirno ve Şoşon Üstüyan ve Debbâğ oğlu Raşko ve Üstüyan oğlu Mihal ve Kaspar oğlu Yuvan ve Tepedenli Todori ve Rado oğlu Velko ve Karamoskov oğlu Doyco nâm zimmîler meclis-i şer‘-i münîrde kasablar kethüdâsı el-Hâc Hasan Ağa b. el-Hâc Osman muvâcehesinde kasab ustalarından el-Hâc İbrahim Ağa ve sâir mazbûtü’l-esâmî Müslimîn hâzır oldukları hâlde bize ve gāibûn ani’l-meclis Sâyeli Ârif Ağa ve Arnabud Yakub Ağa ve Koca Mustafa nâm Müslimîn ile Büyük Osko ve Küçük Osko ve diğer Üstüyan [67b] ve Neşo ve Edirneli Kanco ve Naydan Çorbacı nâm zimmîler Rumeli cânibinden memâlik-i mezkûreden celb ve Âsitâne-i aliyyeye sevk ve tesyîr eylediğimiz ber-mûceb-i defter-i müfredât cem‘an altmış üç bin dokuz yüz yirmi re’s ağnâmımızın hâlâ hâssa kassabbaşısı dergâh-ı âlî kapıcıbaşılarından es-Seyyid el-Hâc Mustafa Ağa’nın inzımâm-ı re’y ve ma‘rifetiyle lühûmunun beher vakıyyesini otuz yedişer paraya ve yapağısını erkeğin ağnâm sakatlarını kırkar paraya ve yapağıslı mâriye ağnâm sakatlarını otuz beşer paraya kassabân esnâfına tevzî‘a ve ağnâm-ı mezkûremizin mikdâr ve fiyatını mübeyyin yaftalarını hîn-i tevzî‘lerinde kırk bir gün mürûrunda bize teslîme kethüdâ-yı merkūm ve ağnâm-ı mezkûre lühûmunun beher vakıyyesini narh-ı cârî üzere kırkar paraya ibâdullâha beye ve semenleri olan akçelerini seksen bir gün tamamında edâya esnâf-ı merkūmûn ta‘ahhüd ve tarafeynden her birimiz âharın ta‘ahhüdünü kabûl eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 29 Ş sene [12]37