İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 350 Hüküm no: 329 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havâss-ı Refîa kazâsına bağlı Büyükçekmece ve Küçükçekmece’deki çiftliklerden getirilen kuzuların kasap esnafına dağıtımı Kasab Ma‘rûz-ı dâ‘î [-i devlet-i aliyyeleridir ki] Havâss-ı Refî‘a kazâsına muzâfe Çekmece-i kebîr ve sagīr kazalarında vâki‘ ashâb-ı çiftlikândan mandıra ve ağıl ve ağnâm ashâbı mazbûtü’l-esâmî Müslimîn ve re‘âyâ ve Çifçibaşıları Halil Ağa nâm kimesneler meclis-i şer‘-i enverde hâlâ hâssa kasabbaşısı dergâh-ı âlî kapıcıbaşılarından es-Seyyid el-Hâc Mustafa Ağa hâzır olduğu hâlde kasablar kethüdâsı el-Hâc Hasan Ağa b. el-Hâc Osman muvâcehesinde kasab ustalarından kezâlik mazbûtü’l-esâmî Müslimîn hâzır oldukları hâlde işbu târih-i i‘lâm şehrinin on üçüncü Pazar gününe tesadüf eden işbu sene-i mübâreke rûz-ı hızırında dahi de’b-i kadîm üzere zebh ve ibâdullâha bey‘ içün bundan mukaddemce yedlerimizde mevcûd kuzuları ketm etmeyüp tamamen kassabâna vermek üzere bâ-i‘lâm-ı şer‘î ve bâ-takrîr ta‘ahhüd edüp mûcebince fermân-ı âlî dahi şeref-bahş-ı sahife-i sudûr olup hâlâ Çekmece-i kebîr kazâsından beş bin dört yüz re’s ve Çekmece-i sagīr kazâsından beş bin dokuz yüz yirmi re’s ki hâlâ yedlerimizde mevcûd olup vech-i meşrûh üzere sevk ve tesyîre müte‘ahhid olduklarımız cem‘an on bir bin üç yüz yirmi re’s kuzularımızın lühûmunun ağa-yı mûmâ-ileyhin inzımâm-ı re’y ve ma‘rifetiyle beher vakıyyesini otuz dörder paraya kassabâna ve kassabân dahi ikişer para zammıyla ibâdullâha otuz altışar paraya bey‘e ve esmânı esnâf-ı mezkûre bize bilâ-cevr edâya tarafeynden her birimiz ta‘ahhüd eyledik deyü ikrâr ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 8 Ş sene [12]37