İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 350 Hüküm no: 330 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den İstanbul’a getirilen koyunların kasap esnafına dağıtımı Kasab Ma‘rûz[-ı dâ‘î-i devlet-i aliyyeleridir ki] Vilâyet-i Rumeli’nde vâki‘ Bosna ve Samako câniblerinden Âsitâne-i aliyyeye ber-vech-i âtî kıvırcık ağnâmı celb eden Rumeli celebânından Arnavud Mehmed Sipâhî ve Karaca karyeli Murad Ağa ve Kara Yunus ve Seydî ve İshak ve Ali Kethüdâ ve Ekmekçi Tahir ve Rakkalı Edhem ve Rakkalı Mahmud ve Ekmekçi Zeynel ve diğer Zeynel ve Arnavud Ömer Ağa ve Rakkalı Molla Fettâh ve Sipâhî ve diğer Tahir ve Genc Osman Ağa ve Zübeyr ve Üsküblü İsmail ve Bekir Ağa tâbi‘-i Pehlivan Ağa ve diğer Murad Ağa ve Bayram nâm Müslimîn ile re‘âyâdan Avratalanlı Niço ve Raşko ve Dobriçeli Dimitri ve Avratalanlı Koviçe ve Desiko oğlu Naydan ve Miçokehya ve Avratalanlı Binoğlu Vanko ve Tetavanlı Todori ve Avratalanlı Ganco ve Edirneli Mihal ve Avratalanlı Niço ve Çalık Velko ve Küçük Velko nâm zimmîler meclis-i şer‘-i münîrde hâlâ kasablar kethüdâsı el-Hâc Hasan Ağa b. el-Hâc Osman muvâcehesinde Yedikule kasab ustalarından es-Seyyid Hasan Efendi b. Mehmed ve Eğrikapu kasab ustalarından es-Seyyid Osman Ağa b. Ömer ve Mehmed Efendi b. İbrahim hâzır oldukları hâlde bizim bu def‘a Rumeli cânibinden zikr olunan Bosna ve Samako câniblerinden celb ve Âsitâne-i aliyye[ye] sevk ve tesyîr eylediğimiz ber-mûceb-i defter-i müfredât cem‘an kırk bin dokuz yüz kırk re’s kıvırcık ağnâmımızın hâlâ hâssa kasabbaşısı dergâh-ı âlî kapıcıbaşılarından es-Seyyid el-Hâc Mustafa Ağa’nın inzımâm-ı re’y ve ma‘rifetiyle lühûmunun beher vakıyyesini otuz yedişer paraya ve Yapağılı erkek ağnâm sakatlarını kırkar paraya ve mârye ağnâm sakatlarını otuz beşer paraya kassabân esnâfına tevzî‘ ve ağnâm-ı mezkûrun mikdâr ve fiyatını mübeyyin yaftalarını hîn-i tevzî‘den kırk bir gün mürûrunda bize teslîme kethüdâ-yı merkūm ve lühûmunun beher vakıyyesini narh-ı cârîsi üzere kırkar paraya ibâdullâha bey‘e ve semenleri olan akçelerini vakt-i tevzî‘den altmış beş gün tamamında edâya esnâf-ı hâzirûn-ı mezbûrûn ve sâirleri müte‘ahhid ve tarafeynden her birimiz âharın ta‘ahhüdünü kabûl eyledik deyü ikrâr ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 28 B sene [12]37