Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 310 Hüküm no: 333 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alime bt. Hüseyin’in kendisi ilk evliliğinden mehir borcu olan kocası İvaz b. Abdullah’ın zimmetini ibrâ etmesi Mahmiye-i İstanbul’da el-Hâc İlyas mahallesinde sâkine olup zâtı ma‘rifet-i şer‘iyye ile mu‘arrifeyn Ebûbekir Efendi b. Sefer ve el-Hâc Mustafa b. Musa ta‘rîfleriyle mu‘arrefe olan Âmile bt. Hüseyin nâm hâtun meclis-i şer‘-i şerîf-i lâzımü’t-teşrîfde hâlâ zevci olan bâ‘isü hâze’l-kitâb İvaz b. Abdullah mahzarında ikrâr ve takrîr-i kelâm edip bundan akdem mezbûr [İvaz] iki bin beş yüz akçe mehr-i müeccel ile nefsimi inkâh ve tezvîc ol dahi tezevvüc ve duhûl edip ba‘dehû beni bâyinen tatlîk etmekle mehr-i müeccelim olan meblağ-ı mezbûru kable’l-ahz tekrâr iki bin akçe üzerine nefsimi mezbûr İvaz’a inkâh ve tezvîc ol dahi şuhûd mahzarında ber vech-i muharrer tezevvüc ve kabûl etmişdi el-hâletü hâzihî mukaddemâ mehr-i müeccelim olan meblağ-ı mezbûr iki bin beş yüz akçeye müte‘allik da‘vâdan mezbûr İvaz’ın zimmetini ibrâ ve iskāt eyledim. elân zimmetinde mehr-i müeccelim olan iki bin akçe kalmışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: İbrahim b. Yunus, Hasan b. Mehmed, İbrahim Çelebi b. Ramazan, el-Hâc Mustafa el-Müezzin, Ebûbekir Efendi b. ( ) el-Müezzin, Abdurrahman (…).