İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 359 Hüküm no: 341 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gabril v. Avanes’in, malik olduğu kaymakçı gediğini Avanes v. Haçador’a sattığı Kaymakçı gediği sûret i‘tâsı Ma‘rûz[-ı dâ‘î-i devlet-i aliyyeleridir ki] Zikri âtî bir bâb kaymakçı gediği âlâtına bir kıt‘a sûret ile mâlik olan Gabril v. Avanes nâm zimmî meclis-i şer‘-i hatîrde fincancılar kethüdâsı vekîli es-Seyyid Mustafa Ağa b. el-Hâc Ali ile Yiğitbaşısı Menteş v. Avram Yahûdi ve esnâfından Kegork v. Anton zimmî hâzır olduğu hâlde âlât-ı mezkûrenin sâhib-i evveli Avanes v. Haçador nam zimmî muvâcehesinde mahmiye-i İstanbul’da Sultan Bâyezid-i Velî Hân -aleyhi’r-rahmetü ve’l-gufrân- Câmi‘-i şerîfi kurbünde kolluk tahtında kâin ma‘lûmü’l-hudûd bir bâb fincancı dükkânı derûnunda mevcûde beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca müstakillen yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin bin beş yüz guruş semen-i makbûza bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d zikr olunan âlât-ı lâzıme-i mezkûrede benim kat‘â alâka ve medhalim kalmayup kemâ-fi’s-sâbık mersûm Avanes zimmînin mâl-ı müşterâsı [olmuşdur] deyü ba‘de’l-ikrâr ve’t-tasdîk zikr olunan âlât-ı lâzıme-i mezkûrenin kaleminden mersûm Gabril zimmî üzerine olan kayd-ı atîki ref‘ ve terkīn ve yedimde olan sûreti battâlda hıfz ve sâhib-i evveli mersûm Avanes zimmî ismine tasrîhan kayd ile yedine müceddeden sûret i‘tâsı bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî 19 L sene 1237