İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 360 Hüküm no: 342 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Ma‘kûl ve Mahmud Ağa’nın fesci esnaflığından çıkarıldıkları Fesçi esnâfından ihrâc Ma‘rûz-ı dâ‘î [-i devlet-i aliyyeleridir ki] Mahmiye-i İstanbul’da kâin fesci esnâfının başihtiyârları Süleyman Ağa üzerine ihtiyârlarından Şa‘ban Ağa ve Ahmed Ağa ve Ervay Salih Ağa ve el-Hâc Yahya ve Salih Ağa ve el-Hâc Salih Ağa ve mahrûse-i Galata fesciler başihtiyârları el-Hâc İsmail Ağa ve ihtiyârlarından Ömer Berik ve el-Hâc Mehmed Ağa ve diğer el-Hâc Yahya ve diğer Süleyman Ağa nâm kimesneler ile Âsitâne-i aliyye ve Galata fesci esnâfından elli neferden mütecâviz mazbûtü’l-esâmî kimesneler esnâf-ı merkūmenin hâlâ İstanbul Kethüdâsı Kasım Ağa ve hâlâ Galata [Kethüdâsı] Said b. Abdüsselam hâzır oldukları hâlde esnâf-ı merkūmeden sâbıkā Galata Kethüdâsı Mahmud Ağa ve esnâfından Süleyman b. Ma‘kûl nâm kimesneler muvâcehelerinde mezbûr Mahmud Ağa bi’d-defa‘ât esnâfımıza Galata kethüdâsı olup lâkin her bir def‘ada kethüdâ olduğu müddetde kendi hâlinde olmayup esnâf-ı merkūmenin ihtilâli nizâmını mûcib ef‘âli sebebiyle her birinde azl ve yerine âhar kethüdâ nasb olundukta esnâf-ı merkūmeden mezbûr Süleyman dahi ittibâ‘ ederek her birinde birer takrîb kethüdâlık-ı merkūmu tahsîl ve esnâf-ı merkūmeye ırz ve nefsâniyet icrâsıyla hilâf-ı şer‘-i şerîf ve mugāyir-i nizâm te‘addî ve rencîde ile cümlemizi tağrîm ve tecrîme bâ‘is olduğundan nâşî bundan akdem kethüdâlık-ı merkūmdan azl olunup yerine bi’l-cümle esnâfımızın marzî ve muhtârımız olan hâzır-ı mezbûr Said b. Abdüsselam taleb ve iltimâsımız ile kıbel-i şer‘den bâ-hüccet Galata kethüdâsı nasb ve ta‘yîn olunup ve hâzır-ı kethüdâ-yı mezbûr Said b. Abdüsselam’ın ahvâl ve ef‘âlinden cümlemiz hoşnûdlar iken kethüdâ-yı sâbık-ı mezbûr Mahmud Ağa kethüdâlık-ı merkūmu tahsîl içün el-yevm kendi hâlinde olmayup Galata fesci esnâfından beyne’l-esnâf dahi mezmûm olan hâlâ işbu meclis-i şer‘de hali bulunan Cuma ve Mahmud Mesud ve Süleyman ve el-Hâc Said ve Ömer ve Hüseyin ve Abdurrahman ve el-Hâc Mehmed ve Ahmed Ağa nâm müfsidleri merkūm Süleyman b. Ma‘kûl’un tahrikiyle başına cem‘ [70a] ve esnâfımızın beynine şikāk ve fesâd ilkāsıyla kemâ-fi’s-sâbık cümlemizin perîşaniyetimizi mûcib olur ef‘âle tasaddî eylediğinden mâ‘adâ mezbûrân Mahmud Ağa ve Süleyman b. Ma‘kûl nâm kimesneler kendi hallerinde olmayup dâimâ tezvîr-i fesâdları zâhir olmağla fîmâ ba‘d merkūm Mahmud Ağa ve mezbûr Süleyman b. Ma‘kûl kat‘an umûr-ı esnâfa müdâhale etmeyüp esnâfımızdan ihrâc olunmak cümlemizin matlûbumuzdur deyü bi’l-muvâcehe her birinin sû-i hâllerini ihtiyâr ile teşekkî eylediklerinde mezbûrândan her biri ba‘de’l-yevm kat‘a umûr-ı esnâfa müdâhale etmemek üzere ba‘de’t-tenbîh esnâf-ı merkūmeden hurûclarını iltimâs eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 19 L sene [12]37