Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 310 Hüküm no: 334 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasandır bt. Yani’nin Mukabeleci Mehmed Efendi Vakfı’na olan borcunun vârislerince ödenmesi gerektiği Mahmiye-i İstanbul’da vâki‘ merhûm Mukābeleci Mehmed Efendi vakfına bi’l-fi‘l mütevellî olan el-Hâc Musa b. Osman meclis-i şer‘-i şerîf-i enverde mahmiye-i mezbûrda Samatya kurbunda Mirahor mahallesinde sâkinler iken bundan akdem hâlike olan Kasandır bt. Yani v. Yorgo nâm nasrâniyenin verâseti zevci Yorgi v. Tanaş ile anası Babik bt. Mihal ve babası mezbûr Yani ve sadrî sagīr oğlu Apostol’e münhasır olup ba‘dehâ sagīr-i mezbûr Apostol dahi fevt olup verâseti babası mezbûr Yorgi ile ceddesi mezbûre Babik’e münhasır olduğu mütehakkik oldukdan sonra verese-i merkūmûn Yorgi ve Yani ve Babik mahzarlarında üzerlerine bi’t-tevliyye da‘vâ ve takrîr-i kelâm edip yedimde olan işbu istiğlâl hücceti nâtık olduğu üzre hâlik-i mezbûre Kasandır hayâtında helâkinden evvel altı ay mukaddem mahalle-i mezbûrede vâki‘ bir tarafdan Nikola ve bir tarafdan Begler ve bir tarafdan Sadet nâm zimmîler menzilleri ve bir tarafdan tarîk-i âmla mahdûd iki oda ve bir sofa ve bahçeyi müştemil mülk menzilimi bi tarîki’l-istiğlâl bana elli guruşa bey‘ ve teslîm ve meblağ-ı mezbûr yedimde olan mâl-ı vakf-ı mezbûrdan kabz ve tesellüm ve ba‘de’t-tahliyye ve’t-tekābuz mezbûre Kasandır’a menzil-i mezbûru târih-i mezbûrdan iki sene tamâmına değin on beş guruşa istîcâr ve kabz ve tasarruf ve kable edâ-i deyn-i vakf hâlik olmuşdu hâlâ verese-i merkūmeye suâl olunup asl-ı mâl-ı mezbûr ile şühûr-ı mezkûrede lâzım gelen on guruş ücrete dahi vaz‘-ı yed eyledikleri hâlik-i mezbûrenin terekesinden bana edâ ve fekk-i rehine tenbîh olunmaları matlûbumdur dedikde gıbbe’s-suâl verese-i merkūmûn cevâblarında kaziyye minvâl-i meşrûh üzre olduğunu her biri tâyi‘an ikrâr ve i‘tirâf etmeğin mûcebince asl-ı mâl-ı merkūm ile ücret-i merkūme ki cem‘an altmış guruşu mütevellî-i merkūma tereke-i mezbûreden edâ ve teslîme ve fekk-i rehin verese-i merkūmûna ba‘de’t-tenbîh mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: İbrahim b. Ahmed, el-Hâc Mustafa b. Tevekkül, Mustafa b. Mehmed, İsmail b. Mehmed.