İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 364 Hüküm no: 347 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafından Molla Hüseyin b. Hasan’ın, nizama aykırı sabun dükkânı açmayacağını taahhüt ettiği Sabuncu esnâfının tablakârlar ile nizâ‘ı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin sabuncu esnâfının kethüdâları es-Seyyid el-Hâc İbrahim Ağa ve Yiğitbaşı es-Seyyid el-Hâc Hasan ve esnâfından es-Seyyid Ali Ağa ve es-Seyyid Mehmed Ârif Ağa ve diğer es-Seyyid Ali Ağa ve Hüseyin Ağa ve es-Seyyid Mustafa Ağa ve es-Seyyid Osman Ağa nâm kimesneler ile re‘âyâdan Marat ve Abraham nâm zimmîler meclis-i şer‘-i münîrde esnâf-ı merkūmeden mahmiye-i mezbûrede Ebu’l-feth Sultan Mehmed Hân -aleyhi’r-rahmetü ve’l-gufrân- hazretlerinin câmi‘-i şerîfleri havlusunda sergi tâ‘bir olunur sabuncu tablasında sabun bey‘ eden Alâaddin oğlu es-Seyyid Molla Hüseyin b. Hasan nâm kimesne muvâcehesinde sarraf tâifesinden Mardıros v. Agob nâm zimmî hâzır olduğu hâlde mezbûr es-Seyyid Molla Hüseyin esnâfımızın küfeci tâifesinden olup lâkin ber-vech-i muharrer me’zûn olduğu mahâll-i mezbûrda sabun bey‘iyle te‘ayyüşe kāni‘ olmayup mahmiye-i mezbûrede Osmaniye Câmi‘-i şerîfinin sarıkçılar cânibinde olan kapısı karşısında köşede vâki‘ hâzır-ı mesfûr Sarraf Mardıros zimmînin müsteciri olduğu bir bâb sarraf dükkânı tahtında vâki‘ kezâlik müsteciri olduğu bodrum tâ‘bir olunur bir bâb mağazayı hâzır-ı mersûmdan istîcâr ve derûnuna sabun vaz‘ıyla ihtikâr ve gālî bahâ ile bey‘ ve ibâdullâhı ızrâr etmekle bu sûretde esnâfımızın her birimizin yedlerimizde dükkânımız ve sergimiz var iken kadîmden sabuncu dükkânı olmayan mahalde diğer dükkân ve mağaza ve sergi ihdâsı nizâmımızın ihtilâlini mûcib ve beyne’l-esnâf fesâdı müstevcib hâlâtdan olmağla mağaza-i merkūmeyi tahliye ve sarraf-ı hâzır-ı mersûma red edüp fîmâ ba‘d bu makūle ihtikâr ile ibâdullâhı ızrâr etmemek ve esnâfımızın nizâmına halel vermemek üzere mezbûr es-Seyyid Molla Hüseyin’e tenbîh eylediğimizde ol dahi mücâb ve mülzem olup sarraf-ı hâzır-ı mersûm ile bi’t-terâzî fesh-i îcâr ve mağaza-i merkūmeyi tahliye ve mesfûra red ve teslîm etmekle ba‘de’l-yevm zikr olunan bodrum tâ‘bir olunur mağazayı sabuncu [71a] esnâfından bir kimesneye îcâr etmemek üzere sarraf-ı hâzır-ı mesfûr ve zikr olunan Sultan Mehmed Câmi‘-i şerîfi havlusunda kâin yedinde olan sergi tâ‘bir olunur tabladan mâ‘adâ âhar mahalde dükkân ve mağaza ve sergi ihdâs etmemek üzere mezbûr es-Seyyid Molla Hüseyin’den her biri ta‘ahhüd eylediklerinde ve her birimiz dahi ta‘ahhüdlerini kabûl eyledik deyü eyledikleri takrîrlerini mezbûr es-Seyyid Molla Hüseyin ve sarraf-ı hâzır-ı mersûm Mardiros zimmî tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 21 L sene [12]37