İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 370 Hüküm no: 353 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah ile Berber Seyyid Ömer Ağa’nın menzil davasında sulh oldukları Menzil nizâ‘ından 500 guruş üzerine sulh Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden zâtı mu‘arrefe Emine Hatun bt. Abdullah evvelâ bi’d-defa‘ât Çarşamba günleri arz odasında huzûr-ı hazret-i Sadâret-penâhîde ve ba‘dehû du‘âhânemizde ma‘kūd meclis-i şer‘-i enverde zikri âtî bir bâb menzilin hâmiş-i arzuhâlde mastûr derkenâr nâtık olduğu üzere dört sehm i‘tibâriyle üç sehmine bâ-temessük-ı mütevellî mutasarrıflar olup ol vechile vaz‘-ı yedleri mütehakkık olan kendi nefsinden asıl ve zevcesi Hadice Hatun bt. Ali tarafından müseccel vekîli derûn-ı arzuhâlde ismi mezkûr Berber es-Seyyid Ömer Ağa b. Mehmed muvâcehesinde ashâb-ı hayrâtdan defterdâr-ı esbak merhûm Hüseyin Efendi’nin İstanbul’da Kaliçeci Hasan Câmi‘inde Şeyhülkurrâ ve mu‘allim-i sıbyân ta‘yîn eylediği vakfının bi’l-meşrûta mütevelliyesi mu‘arrefetü’z-zât Zübeyde Hanım bt. Abdülvehhab hâzır olduğu hâlde vakf-ı mezbûr müsakkafâtından zikr olunan Kaliçeci Hasan Mahallesi’nde vâki‘ ma‘lûmü’l-hudûd şehriye yirmi akçe icâre-i müecceleli bir bâb menzil bâ-re’y-i mütevellî müstakilleten bi’l-icâreteyn tasarrufumda iken bi-kazâillâhi te‘âlâ bundan akdem muhterik olup arsa-yı sırfa kaldıkdan sonra ben zikr olunan menzil arsamın dört sehm i‘tibâriyle bir sehmini tasarrufumda ibkā ve iki sehmini mezbûr Berber es-Seyyid Ömer Ağa’ya ve bir sehmini zevcesi müvekkile-i mezbûre Hadice Hatun’a bin iki yüz otuz dört senesi Zilka‘deti’ş-şerîfesinin yirmi beşinci günü bâ-re’y-i mütevelliye-i mezbûre ferağ eder olduğumda zevcân-ı mezbûrândan her biri bana ölünceye değin bakmak şartıyla meccânen ferağ ve tefvîz onlar dahi şart-ı mezkûr ile tefevvüz ve kabûl mütevelliye-i hâzıra-i mezbûre dahi ol vechile tasarruflarına ba‘de’l-izn mezbûr Berber es-Seyyid Ömer Ağa kendi mâlıyla arsa-yı mezkûreye teberru‘an li’l-vakf müceddeden menzil binâ ve inşâ edüp lâkin şart-ı mezkûr ile olan ferağım sahîh ve mu‘teber olmamağla menzil-i mezkûrdan ber-i‘tibâr-ı merkūm üç sehmini bâ-re’y-i mütevelliye bi’l-vesâye ve bi’l-vekâle geri bana ferağ etmek üzere tenbîh olunmak matlûbumdur deyü bundan akdem dahi mezbûr Berber es-Seyyid Ömer Ağa’dan da‘vâ eylediğimde ol dahi bi’l-asâle ve bi’l-vekâle yine mütevelliye-i hâzıra-i mezbûrenin tasdîkiyle cevâbında menzil-i mezkûrun ber-i‘tibâr-ı merkūm üç sehmini zevcem müvekkile-i mezbûre ile bana iki yüz yirmi guruş bedel ile kat‘an fâriğa olmuşidin deyü şart-ı mezkûr ile ferağ-ı müdde‘âmı külliyen ba‘de’l-inkâr ben ber-vech-i muharrer şart-ı mezkûr ile ferağ-ı müdde‘âma ityân-ı beyyineden ızhâr-ı acz edüp zevcân-ı mezbûrânı tahlîfe dahi tâlibe olmamla mûcebiyle beni işbu sene-i mübâreke Şa‘bâni’l-mu‘azzamının dokuzuncu günü tarihiyle müverrah zevcân-ı mezbûrâna yedlerinde olan i‘lâm-ı şer‘î nâtık olduğu üzere da‘vâ-yı mezkûremle bilâ-beyyine âmme-i mu‘ârazadan men‘ olunmuşken hâlâ kemâ-fi’s-sâbık da‘vâya tasaddî eylediğimde muslihûn tavassutuyla beynimiz tevfîk ve ıslâh olunup beni menzil-i mezkûrdan ber-minvâl-i meşrûh dört sehm i‘tibâriyle hâlâ mutasarrıfe olduğum bir sehm hisse-i mezbûremi dahi hüsn-i rızâmla şürût-ı müfsideden ârî ferağ-ı mu‘teber-i kat‘î ile mezbûr Berber es-Seyyid Ömer Ağa’ya mütevelliye-i hâzıra-i mezbûre Zübeyde Hanım ma‘rifetiyle ferağ ve tefvîz eylediğimde ol dahi bâ-re’y-i mütevelliye-i mezbûre tefevvüz ve kabûl ve hisse-i mezkûrenin bedeli olan beş yüz guruşu nakden bana def‘ ve teslîm ve teberru‘ etmekle ben dahi yedinden ahz ü kabz edüp ba‘de’l-yevm hisse-i mezkûrede dahi benim kat‘an alâka ve medhalim kalmayup husûs-ı mezkûra müte‘allika kat‘-ı nizâ‘ eyledim deyü ikrâr ve tasdîkleri ba‘de’t-tescîl İstanbul Mahkemesi’nden huzûr [-ı âlîlerine i‘lâm olundu.] Fî 24 L sene [12]37