İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 371 Hüküm no: 354 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikagos v. Mıgırdıç’ın, Bozaned v. Manasa aleyhine açtığı davada iddiasını ispat edemediğinden muarazadan men edildiği Eşyâ-i mütenevvi‘a semenlerinden 9.318 guruş men‘i i‘lâmı Sahhe’l-bâkī Ma‘rûz[-ı dâ‘î-i devlet-i aliyyeleridir ki] Sarraf tâifesinden sâhib-i arzuhâl Eğinli Ağbek oğlu Nikagos v. Mıgırdıç nâm zimmî meclis-i şer‘-i münîrde derûn-ı arzuhâlde mastûrü’l-ism Bozaned v. Manasa nâm zimmî muvâcehesinde mersûm Bozaned zimmînin li-ebeveyn er karındaşı ve Darbhâne-i Âmire’de mukāta‘a sarrafı olup bundan akdem hâlik olan Kirkor zimmînin veresesi zevcesi Derohi bt. Begos ve sulbiye kebîre kızı Adgapar Nasrâniyeler sulbî kebîr oğlu Artin zimmî taraflarından husûs-ı âtîde vekîlleri olduğu mersûmetânın şahıslarını bilir Sarraf İstefan v. Haylid ve Agob v. Serkiz nâm zimmîler şehâdetleriyle ber-nehc-i şer‘î sâbit olan Halebli Hanna v. Haçok zimmî ile mesfûr Bozaned zimmînin diğer karındaşı kezâlik derûn-ı arzuhâlde ismi mastûr Sarraf Mıgırdıç zimmî hâzır oldukları [hâlde] li-ebeveyn er karındaşı olup el-yevm Ahıska’da mütemekkin olan Aleksan zimmî mersûm Bozaned zimmînin karındaşı hâlik-i mesfûr Kirkor zimmînin sağlığında vekîl-i harclık zimmetinde olmağla hâlik-i mersûmun bi-şartü’r-rücû‘ emriyle kendi mâlıyla aldığı bâ-defter-i müfredât zehâyir ve eşyâ-i mütenevvi‘a-yı ma‘lûme ve mesârif-i sâireden gayr-ez makbûzât sahhe’l-bâkī dokuz bin üç yüz on sekiz guruş otuz iki para bi’l-mürâca‘a alacak hakkı olup kable’l-ahz ve’l-istîfâ mersûm Kirkor zimmî hâlik oldukdan sonra bin iki yüz otuz beş senesi Recebi’l-ferdinin yirmi sekizinci günü ancak mersûm Bozaned zimmî mûrisim olmayan karındaşım hâlik-i mesfûrun senin karındaşın Aleksan zimmîye dokuz bin üç yüz on sekiz guruş otuz iki para deyni olmağla sen meblağ-ı mezkûr dokuz bin üç yüz on sekiz guruş otuz iki parayı mâlından karındaşın mersûm Aleksan zimmîye bana rücû‘ şartıyla edâ ve teslîm ile ba‘dehû ben dâminim deyü bana emr etmekle ben dahi emr-i mezkûruna binâen ol mikdâr guruşu mâlımdan karındaşım mesfûr Aleksan zimmîye edâ etmemle bi’l-mürâca‘a mersûm Bozaned zimmîden tazmîn taleb ederim deyü ba‘de’d-da‘vâ ve’l-inkâr müdde‘î-i mesfûr Nikagos zimmî ber-vech-i muharrer müdde‘âsına ikāmet-i beyyine edemeyüp bi’t-taleb mersûm Bozaned zimmî bi’l-muvâcehe vech-i şer‘î üzere tahlîf olunmağın mûcebince müdde‘î-i mesfûr Nikagos zimmî da‘vâ-yı mezkûresiyle mersûm Bozaned zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 24 L sene 1237