Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 311 Hüküm no: 335 Orijinal metin no: [51b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Ağa b. Mehmed’in kölesi Receb’i azat etmesi Husûs-ı âti’l-beyânın mahallinde ketb ü tahrîr için bi’l-iltimâs savb-ı şer‘den irsâl olan Mehmed Efendi b. Mustafa mahmiye-i İstanbul’da Sultanhamamı kurbunda vâki‘ zahrü’l-eşbâh [52a] Receb Ağa b. Mehmed’in sâkin oldukları menzile varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i şerîf eyledikde mûmâ-ileyh Receb Ağa meclis-i ma‘kūd-ı mezbûrede kendiye rıkkını i‘tirâf eden açık kaşlı gök gözlü sarı sakallı uzun boylu başında eser-i cerhleri var Rûsiyyü’l-asl müslimetü’l-mille sâhibü’l-vesîka Receb b. Abdullah mahzarında ikrâr ve takrîr-i kelâm edip ıtk-ı rakabât a‘zam-ı rakabât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘tak[ın] ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûm-ı latîf[i] ıttılâ‘ım olmağın mevsûf-ı mezbûr Receb hasbeten lillâhi te‘âlâ ve haseneten li rûhi rasûlihi’l-mu‘allâ tahrîr ve i‘tâk ve kayd-ı rıkkıyyetden ıtlâk ve kazâ-i hürriyete ilhâk eyledim ba‘de’l-yevm merkūm Receb sâir harâir-i ahrâr-ı asliyyîn gibi hür olup üzerinde şer‘an mevâlî için sâbit olan velâdan gayrı hakkım kalmadı dedikde vâki‘ hâli Mevlânâ-yı mezbûr mahallinde ketb ve terkīm ba‘dehû cânib-i şer‘den ma‘an ba‘s olunan Ali b. Bâli ile meclis-i şer‘a gelip alâ vukū‘ihî inhâ ve takrîr etmeğin işbu vesîka ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Halil b. Ahmed, Ahmed Efendi b. Hasan, Abdülkādir Efendi, Seyyid Ahmed Efendi b. Abdullah, Şeyh İsmail Efendi b. Ahmed.