İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 372 Hüküm no: 355 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Begos ve oğlu Hamparsum’un Ortaköy’deki menzil davasının reddedildiği Ortaköy’de menzil keşfi Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâl bâlâsına sâdır olan fermân-ı âlîlerine imtisâlen zikri câ‘î husûsun mahallinde ketb ü tahrîri içün savb-ı şer‘-i enverden me’zûnen irsâl olunan kâtib Hâfız Mehmed Hidâyetullah Efendi dâ‘îleri ve bi’l-ma‘iyye rü’yete memûr Haremeyn-i şerîfeyn Müfettişi mevâlî-i izâmdan Hatîbzâde Fazîletlü es-Seyyid Mehmed Derviş Efendi tarafından mürsel Kâtib es-Seyyid Mehmed Nureddin Efendi hâssa mimarı hulefâsından Serhalîfe Mustafa ve Mehmed Emin Halîfeler ile mahrûse-i Galata muzâfatından Ortaköy’de Ermeni kenîsesi Mahallesi’nde vâki‘ hâmiş-i arzuhâlde mastûr defter-i vakıfdan muhrec derkenâr nâtık olduğu üzere nezâret-i dâ‘îlerinde âsûde evkāfdan merhûm el-Hâc Hâfız İbrahim Efendi Vakfı müsakkafâtından olup bir tarafdan Çilingir Niko Nimyos zimmî menzili ve bir tarafdan Kuyumcu Refayil v. Panayot zimmî menzili bahçesi ve bir tarafdan Sarraf Cani zimmî menzili bahçesi ve taraf-ı râbi‘i tarîk-i âm ile mahdûd ve müştemilât-ı ma‘lûmeyi hâvî şehriye altmış akçe icâre-i mueccelelü Kayıkçı Haçador v. Begos zimmî ile zevcesi Aranohi bt. Begos Nasrâniyenin bi’l-iştirâk tasarruflarında olan bir bâb menzile varup cerîdede mazbûru’l-esâmî Müslimîn huzûrlarında akd-i meclis-i şer‘-i âlî ettiklerinde sâhibey arzuhâl mersûm Kayıkçı Haçador zimmî asâleten ve zevcesi mesfûre Arafohi Nasrâniyenin oğlu ve tarafından husûs-ı âtîde vekîl olduğu şahsını bilir es-Seyyid Mustafa Şükrü Ağa b. Ahmed nâm kimesne ile Mıgırdıç v. Karabet zimmî şehâdetleriyle sâbit olan Hamparsum v. el-mersûm Haçador zimmî vekâleten meclis-i ma‘kūd-ı mezkûrda Dârü’s-sa‘âdeti’ş-şerîfe Ağası hazretleri nezâret-i aliyyelerinde âsûde evkāfdan Bâbüssaâde ağası esbak merhûm Ahmed Ağa Vakfı müsakkafâtından kezâlik şehriye altmış akçe icâre-i müeccelelü menzil-i merkūm karşısında kâin tarîk-i has aşırı ma‘lûmü’l-hudûd bir bâb menzile bâ-temessük-ı mütevellî mutasarrıfe olan Pars bt. Ohannes Nasrâniye tarafından husûs-ı âtîde vekîl-i müseccel-i şer‘îsi Arakil v. Berozar zimmî nezâret-i hazret-i müşârun-ileyhde âsûde evkāfdan merhûm Mehmed Kethüdâ Vakfı müsakkafâtından şehriye otuz akçe icâre-i müeccelelü menzil-i mezkûr verâsında vâki‘ ma‘lûmü’l-hudûd bir bâb menzile bâ-temessük-ı mütevellî bi’l-münâsafa iştirâken mutasarrıflar olup kendi nefsinden asıl ve zevcesi Armadati bt. Abro Nasrâniye tarafından husûs-ı âtîde vekîl-i müseccel-i şer‘îsi mersûm Refayil zimmî muvâcehelerinde merhûm-ı mezbûr el-Hâc Hâfız İbrahim Efendi Vakfı’nın mütevellîsi müderrisîn-i kirâm-ı zevi’l-ihtirâmdan el-Hâc Mehmed Hâlid Efendi tarafından vekîl-i mürseli kâtib-i vakf İbrahim Edhem b. el-Hâc Ahmed ve merhûm-ı mezbûr Ahmed Ağa Vakfı’nın mütevelliyesi zâtı mu‘arrefe Esma Hatun bt. Mustafa ve merhûm-ı merkūm Mehmed Kethüdâ Vakfı’nın mütevellîsi İsmail Bey b. İbrahim Bey hâzirûn oldukları hâlde işbu derûnunda akd-i meclis-i şer‘-i âlî olunup benimle ber-vech-i muharrer zevcem müvekkile-i mersûme Aranohi Nasrâniyenin bi’l-münâsafa iştirâken taht-ı tasarruflarımızda olan menzil-i mahdûd-ı mezkûrun karşısında kâin tarîk-i has aşırı müvekkile-i mersûme Pars Nasrâniyenin merhûm-ı mezbûr Ahmed Ağa vakfından olan menzili bahçesinin mimârân-ı mezbûrân mesâhalarıyla tûlen sekiz zirâ‘ on sekiz parmak ve arzen yedi zirâ‘ üç parmak terbîan altmış iki zirâ‘ on sekiz parmak mahalli ile tarîk-i hass-ı merkūmun tûlen yedi zirâ‘ ve arzen iki zirâ‘ on sekiz parmak mahalli fi’l-asl merhûm el-Hâc Hâfız İbrahim Efendi Vakfı müsakkafâtından olup benimle zevcem müvekkile-i mersûmenin tasarrufumuzda olan menzil-i mahdûd-ı mezkûr müştemilâtından olarak ve etrâfında kâin zevcân asıl ve müvekkil-i mersûmân Refayil v. Mâdeti Nasrâniyelerin merhûm-ı mezbûr Mehmed Kethüdâ vakfından olan menzili bahçesinin kezâlik mimârân-ı mezbûrân mesâhalarıyla tûlen on zirâ‘ ve arzen dokuz zirâ‘ yirmi parmak bi-hisab-ı terbî‘i doksan sekiz zirâ‘ sekiz parmak mahalli fi’l-asl [73a] merhûm-ı mezbûr el-Hâc Hâfız İbrahim Efendi Vakfı müsakkafâtından olup benimle zevcem müvekkile-i mersûmenin tasarrufumuzda olan menzil-i mahdûd-ı mezkûr müştemilâtından olarak bizden mukaddem mutasarrıfları tasarruf etmiş olmalarıyla ol vechile bizim tasarrufumuzda olmak iktizâ edüp lâkin menzil-i mahdûd-ı mezkûru otuz dört seneden berü zikr olan mahalleri her biri menzillerine idhâl etmeleriyle sâlifü’l-beyân mahallerden keff-i yed ve bâ-ma‘rifet-i mütevellî bize teslîme mersûmûna tenbîh olunmak bi’l-asâle ve bi’l-vekâle matlûbumuzdur deyü da‘vâ ettiklerini kâtibân-ı mezbûr dâ‘îleri Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘a gelüp tarafeyn ve mütevellîleri vekîller ve asıllar hâzirûn oldukları hâlde tasdîkleriyle inhâ eylediklerinde asıl ve vekîl-i mersûmân Refayil ve Arakil zimmîler müdde‘iyân-ı mersûmânın da‘vâ-yı mezkûrelerini inkârlarından mâ‘adâ zevcân-ı mesfûran menzil-i mezkûrlarını bin iki yüz üç senesi hılâlinde bâ-re’y-i mütevellî hudûd-ı mezkûresi ile tefevvüz edüp târih-i mezkûrdan berü bizim ve müvekkile-i mersûmenin tasarruflarımızda menzileyn-i mezkûreynden münâza‘un-fihimâ olan mahâll-i merkūmları otuz dört sene müddetde mukaddemâ ve hâlâ mutasarrıfları zevcân-ı mersûmân muvâcehelerinde bâ-re’y-i mütevellî bilâ-nizâ‘ mutasarrıflar olup müddet-i mezkûrede bir beldede sâkinler ve da‘vâ mümkün iken da‘vâ etmeyüp bilâ-özr sükūt etmişler idi dediklerini asıl ve vekîl-i mersûmân Kayıkçı Haçador ve oğlu Hamparsum zimmîler tasdîk etmeleriyle müdde‘iyân asıl ve vekîl-i mersûmânın tasdîkleri mûcebince otuz dört sene bilâ-özr terk-i da‘vâ eyledikleri zâhir olmağın bu sûretde on beş sene bilâ-özr terk olunan vakf-ı akār tasarrufu da‘vâsının istimâ‘ından sarâhaten izn-i hümâyûnu hâvî emr-i âlî olmadıkça hükkâm-ı şer‘-i şerîf memnû‘lar olmalarıyla mûcebince müdde‘iyân-ı asıl ve vekîl-i mersûmân Haçador ve oğlu Hamparsum zimmîlerin da‘vâ-yı mezkûreleri bilâ-emr-i âlî istimâ‘ olunmadığı kendilere tefhîm ve bî-vech mu‘ârazaları men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 28 L sene 1237