İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 374 Hüküm no: 356 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Halil’in, Sultan Abdülhamid Han vakfından icareli kasap dükkânı gediğinin yarım hissesini İbrahim Ağa’ya devrettiği Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût olan kasab dükkânlarından mahmiye-i mezbûrede Aksaray kurbünde sebîl karşısında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf hissesine bâ-temessük-ı mütevellî mutasarrıf olan kasab ustalarından el-Hâc Hasan Ağa b. el-Hâc Halil meclis-i şer‘-i münîrde kasab ustalarından es-Seyyid el-Hâc İbrahim Ağa b. es-Seyyid Mustafa muvâcehesinde zikr olunan dükkân gediğinden mutasarrıf olduğum nısf hisse-i şâyi‘amı hüsn-i rızâ ve tayyib-i hâtırım ve ferağ-ı kat‘î-i mu‘teber ile merkūm es-Seyyid el-Hâc İbrahim Ağa’ya ferağ ve tefvîz eylediğimde ol dahi tefevvüz ve kabûl ve hisse tevzî‘ini kethüdâ ustaları ma‘rifetleriyle ahz etmek üzere ta‘ahhüd eyledi deyü kasablar kethüdâsı diğer el-Hâc Hasan Ağa b. el-Hâc Osman ve mazbûtü’l-esâmî kasab ustaları hâzır oldukları hâlde eylediği takrîrini mezbûr es-Seyyid el-Hâc İbrahim Ağa ba‘de’t-tasdîk nısf hisse-i mezkûre fâriğ-i mezkûrun kasr-ı yedinden kendi üzerine tahrîr ve şürûtu mûcebince taraf-ı vakıfdan yedine temessük i‘tâsını istid‘â eylediği İstanbul Mahkemesi’nden huzûr [-ı âlîlerine i‘lâm olundu.] Fî 14 Receb sene 1237