İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 375 Hüküm no: 357 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin İstirati v. Tanaş’ın vefâtı üzerine, İbrahim Ağa ile Seyyid Mehmed Lütfullah Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût olan kasab dükkânlarından mahmiye-i mezbûrede Aksaray sebîl karşısında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur nısf hisse-i şâyi‘asına bâ-temessük-ı mütevellî mutasarrıf olan İstirati v. Tanaş nâm zimmî bilâ-veled hâlik olup nısf hisse-i mezkûresi mahlûl ve cânib-i Beytülmâle âid ve râci‘ oldukdan sonra nısf hisse-i mezkûre ba‘de’l-müzâyede ve inkıtâ‘-ı rağbe mu‘accele-i misliyyesi idüğü zâhir olan bin beş yüz guruş mu‘accele-i makbûza ile kasab ustalarından es-Seyyid el-Hâc İbrahim Ağa b. es-Seyyid Mustafa ve es-Seyyid Mehmed Lütfullah Ağa b. el-Hâc Ömer üzerlerinde karar ve ziyâde ile tâlib-i âharı zuhûr etmemekle nısf hisse-i mezkûre iştirâken cânib-i vakıfdan kendilere tefvîz olunduğu mezbûrân meclis-i şer‘de takrîr ve zabıtları içün taraf-ı vakıfdan yedlerine temessük i‘tâsını istid‘â ve hisse tevzî‘ini kethüdâ ve ustalar ma‘rifetleriyle ahz etmek üzere kasablar kethüdâsı el-Hâc Hasan Ağa b. el-Hâc Osman ve mazbûtü’l-esâmî kasab ustaları hâzır oldukları hâlde ta‘ahhüd etmeleriyle nısf hisse-i mezkûre ber-vech-i muharrer hâlik-i mesfûrun mahlûlünden iştirâken merkūmân es-Seyyid el-Hâc İbrahim Ağa ve es-Seyyid Mehmed Lütfullah Ağa üzerlerine mu‘accele-i merkūme ile tahrîr ve taraf-ı vakıfdan şürûtu üzere temessük i‘tâsı niyâzında oldukları İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene 1237