İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 375 Hüküm no: 358 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Ümmügülsüm bt. Halil’in vefâtı üzerine Seyyid Hasan Efendi’ye devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i mezbûre[de] Yedikule hâricinde vâki‘ gayr-ez selhhâne-i mîrî on aded ganem selhhânelerinden [73b] onuncu selhhâneye merbût olan kasab dükkânlarından medîne-i Üsküdar’a muzâfe Kartal kasabasında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin semen hisse-i şâyi‘asında bâ-temessük-ı mütevellî mutasarrıfe olan Ümmügülsüm bt. Halil nâm hatun bilâ-veled fevt olup semen-i hisse-i mezkûresi mahlûle ve cânib-i vakf-ı müşârun-ileyhe âid ve râci‘ oldukdan sonra semen-i hisse-i mezkûre ba‘de’l-müzâyede ve inkıtâ‘u’r-rağbe mu‘accele-i misliyesi idüğü zâhir olan yüz yirmi beş guruş mu‘accele-i makbûza ile kasab ustalarından es-Seyyid Hasan Efendi b. es-Seyyid Mehmed üzerinde karar ve ziyâde ile tâlib-i âharı zuhûr etmemekle semen-i hisse-i mezkûre cânib-i vakıfdan kendüye tefvîz olunduğu mezbûr es-Seyyid Hasan Efendi meclis-i şer‘de takrîr ve zabtı içün taraf-ı vakıfdan yedine temessük i‘tâsı istid‘â ve hisse-i tevzî‘ini kethüdâ ve ustalar ma‘rifetleriyle ahz etmek üzere kasablar kethüdâsı el-Hâc Hasan Ağa b. el-Hâc Osman ve mazbûtü’l-esâmî kasab ustaları hâzır oldukları hâlde ta‘ahhüd etmekle semen-i hisse-i mezkûre ber-vech-i muharrer müteveffât-ı mezbûrenin mahlûlünden merkūm es-Seyyid Hasan Efendi üzerine mu‘accele-i merkūme ile tahrîr ve yedine taraf-ı vakıfdan şürûtu üzere temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene [12]37