İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 376 Hüküm no: 359 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, yarım hisse kasap dükkânı gediğinin Mehmed Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût olan kasab dükkânlarından mahmiye-i mezbûrede Ayasofya kurbünde kâin helvacı dükkânına muttasıl ma‘lûmü’l-hudûd kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf hisse-i şâyi‘asına bâ-temessük-ı mütevellî mutasarrıf olan Suyolcu Kiro zimmî Rum milletinin zâhir olan hıyânet ve mel‘anetlerinden medhali olup bundan akdem katîlen hâlik olmağla bu makūle katîlen hâlik olunanların bi’l-cümle emvâlleri cânib-i mîrîden zabt olunmak üzere irâde ta‘allukuna binâen vakf-ı hazret-i müşârun-ileyhden dahi tasarruflarında olan akār ve gedikleri dahi cânib-i vakıfdan zabt ve âhara bâ-mu‘accele verilmek bâbında dahi irâde-i seniyyeyi müş‘ir cânib-i vakf-ı müşârun-ileyh ve İstanbul mahkemesine vârid olan ilmühaber mûceblerince nısf hisse-i mezkûresi taraf-ı vakıfdan ba‘de’z-zabt nısf hisse-i mezkûre lede’l-müzâyede ve inkıtâ‘u’r-rağbe mu‘accele-i misliyyesi idüğü zâhir olan iki bin elli guruş mu‘accele-i makbûza ile kasab ustalarından Mehmed Ağa b. Hüseyin üzerinde karar ve ziyâde ile tâlib-i âharı zuhûr etmemekle nısf hisse-i mezkûre cânib-i vakıfdan merkūma tefvîz olunduğunu mezbûr Mehmed Ağa tarafından vekîl-i şer‘îsi hâlâ kasablar kethüdâsı el-Hâc Hasan Ağa b. el-Hâc Osman meclis-i şer‘de takrîr ve zabtı içün taraf-ı vakıfdan yedine temessük i‘tâsını istid‘â ve hisse tevzî‘ini kethüdâ ve ustaları ma‘rifetleriyle ahz etmek üzere mazbûtü’l-esâmî kasab ustaları hâzır oldukları hâlde vekîl-i mezbûr Kethüdâ el-Hâc Hasan Ağa ta‘ahhüd etmeğin nısf hisse-i mezbûre ber-vech-i muharrer merkūm Mehmed Ağa üzerine mu‘accele-i mezbûre ile tahrîr ve yedine taraf-ı vakıfdan şürûtu üzere temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene [12]37