İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 377 Hüküm no: 360 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Hâfız Ali b. Hâfız Ahmed’in vefâtı üzerine Hacı Ali b. Osman’a devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden sekizinci selhhâneye merbût olan kasab dükkânlarından mahmiye-i mezbûrede Samatyakapısı dâhilinde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin yedi buçuk hisse i‘tibâriyle bir hissesine bâ-temessük-ı mütevellî mutasarrıf olan Hâfız Ali b. Hâfız Ahmed bilâ-veled fevt olup hisse-i mezkûresi mahlûle ve cânib-i vakfa âid ve râci‘ oldukdan sonra hisse-i mezbûre ba‘de’l-müzâyede ve inkıtâ‘u’r-rağbe mu‘accele-i misliyesi idüğü zâhir olan elli guruş mu‘accele-i matlûbe ile kasab ustalarından el-Hâc Ali b. el-Hâc Osman üzerinde karâr etmekle ziyâde ile tâlib-i âharı zuhûr etmemeğin hisse-i mezkûre [74a] mu‘accele-i makbûza-i merkūme ile taraf-ı vakıfdan mezbûra tefvîz olunduğunu mezbûr el-Hâc Ali tarafından vekîl-i şer‘îsi hâlâ kasablar kethüdâsı el-Hâc Hasan Ağa b. el-Hâc Osman meclis-i şer‘de bi’l-vekâle takrîr ve hisse-i mezkûrenin zabtı içün taraf-ı vakıfdan temessük i‘tâsını istid‘â ve hisse tevzî‘ini bi’l-cümle kethüdâ ve ustalar ma‘rifetleriyle ahz etmek üzere kasab ustalarından mazbûtü’l-esâmî kimesneler hâzır oldukları hâlde vekîl-i merkūm kethüdâ el-Hâc Hasan Ağa bi’l-vekâle ta‘ahhüd etmeğin zikr olunan kasab dükkânı gediğinden yedi buçuk hisse i‘tibâriyle bir hissesi müteveffâ-i mezbûrun mahlûlünden mu‘accele-i merkūme ile müvekkil-i merkūm el-Hâc Ali üzerine tahrîr ve yedine taraf-ı vakıfdan temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene [12]37