İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 378 Hüküm no: 361 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Mehmed Tahir b. Halil ile Halil b. Halil’in vefâtı üzerine Feyzullah Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden altıncı selhhâneye merbût kasab dükkânlarından mahmiye-i mezbûrede Davudpaşa mahkemesi kurbünde dört yolağzında ekmekçi fırını karşısında kâin ma‘lûmü’l-hudûd kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin altı hisse i‘tibâriyle iki hissesine ve yine zikr olunan selhhânelerden sekizinci selhhâneye merbût mahmiye-i mezbûrede Koska nâm mahalde kâin ma‘lûmü’l-hudûd bir bâb kasab dükkânı derûnunda mevcûde kezâlik beyne’l-esnâf gedik tâ‘bir olunur âlât-ı lâzıme-i ma‘lûmenin dokuz hisse i‘tibâriyle iki hissesine mutasarrıf olan Mehmed Tahir ve Halil ibney Halil’den her biri müte‘âkiben bilâ-veled fevt ve zikr olunan dükkânlardan hisse-i mezkûreleri mahlûle [ve] cânib-i vakfa âid ve râci‘ oldukdan sonra lede’l-müzâyede ve inkıtâ‘u’r-rağbe zikr olunan Davudpaşa mahkemesi kurbünde kâin dükkân gediğinden altı hisse i‘tibâriyle iki hisse dört yüz guruş ve sâlifü’z-zikr Koska nâm mahalde kâin dükkân gediğinden dokuz hisse i‘tibâriyle iki hisse dört yüz guruş ki cem‘an mu‘accele-i misliyeleri idüğü zâhir olan sekiz yüz guruş mu‘accele-i makbûza ile kasab ustalarından el-Hâc Feyzullah Ağa b. Mehmed üzerinde karâr etmekle ziyâde ile tâlib-i âharı zuhûr etmemeğin zikr olunan iki bâb kasab dükkânlarının hisse-i mezkûreleri taraf-ı vakıfdan mu‘accele-i merkūmeler ile kendüye tefvîz olunduğunu mezbûr el-Hâc Feyzullah Ağa meclis-i şer‘de takrîr ve zabtı içün taraf-ı vakıfdan temessük i‘tâsını istid‘â ve hisse tevzî‘ini kethüdâ [ve] ustalar ma‘rifetleriyle ahz etmek üzere kassablar kethüdâsı el-Hâc Hasan Ağa b. el-Hâc Osman ve mazbûtü’l-esâmî kasab ustaları hâzır oldukları hâlde ta‘ahhüd etmeğin zikr olunan Davudpaşa mahkemesi kurbünde kâin dükkân gediğinden altı hisse i‘tibâriyle iki hissesi ve sâlifü’l-beyân Koska’da kâin dükkân gediğinden dokuz hisse i‘tibâriyle iki [hissesi] müteveffiyân-ı mezbûrânın mahlûllerinden mezbûr el-Hâc Feyzullah Ağa üzerine tahrîr ve yedine taraf-ı vakıfdan temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene [12]37