İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 379 Hüküm no: 362 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, Yani v. Harito üzerindeki kasap dükkânı gediğinin Hasan Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden beşinci selhhâneye merbût kasab dükkânlarından mahrûse-i Galata’ya muzâfe İstinye nâhiyesine tâbi‘ Mîrgûn karyesinde Baltalimanı tarafında keresteci karşısında kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin sülüs hissesine bâ-temessük-ı mütevellî mutasarrıf olan Andon v. Eşratordine nâhiye-i mezbûreye tâbi‘ Bebek karyesinde kâin ma‘lûmü’l-hudûd bir bâb ve Rumelihisarı karyesinde kâin kezâlik ma‘lûmü’l-hudûd iki ve mahrûse-i mezbûreye muzâfe kasaba-i Beşiktaş’a tâbi‘ Arnavud karyesinde kâin ma‘lûmü’l-hudûd bir bâb ki cem‘an dört bâb kasab dükkânları derûnlarında mevcûde kezâlik gedik tâ‘bir olunur âlât-ı lâzıme-i ma‘lûmelerinin her birilerinin bâ-temessük-ı mütevellî nısf-ı südüs hisselerine mutasarrıf olan mesfûrândan ve âhar nısf-ı südüs hisselerine bâ-temessük-ı mütevellî mutasarrıf olan Yani v. Harito nâm zimmîler bundan akdem dekâkîn-i mezkûre hisselerini terk ve diyâr-ı âhara firâr etmeleriyle Rum tâifesinin zâhir olan hıyânet ve mel‘anetlerinde medhali olup diyâr-ı âhara firâr edenlerin bi’l-cümle emvâl-i metrûkeleri cânib-i mîrîden zabt irâde-i aliyye ta‘allukuna binâen vakf-ı hazret-i müşârun-ileyh müstegallâtından tasarruflarında bulunan akār ve gedikleri dahi cânib-i vakıfdan zabt ve mu‘acceleleri cânib-i vakıfdan kabz ile âhara verilmek bâbında dahi irâde-i seniyyeyi müş‘ir cânib-i vakf-i müşârun-ileyhe ve İstanbul mahkemesine [74b] vârid olan ilmühaber kāimeleri mûceblerince husûs-ı mezkûra taraf-ı vakıfdan ba‘de’z-zabt lede’l-müzâyede ve inkıtâ‘u’r-rağbe zikr olunan Mîrgûn karyesinde kâin dekâkîn gediği sülüs hissesi mu‘accele-i misliyesi olan yedi yüz elli guruş ve sâlifü’l-beyân cem‘an dört dekâkîn gediklerinin her birlerinden nısf-ı südüs hisselerinden her birlerinden sülüs hisseleri kezâlik mu‘accele-i misliyyeleri olan bin yüz guruş ki cem‘an bin sekiz yüz elli guruş mu‘accele-i makbûza ile hâlâ kasablar kethüdâsı el-Hâc Hasan Ağa b. el-Hâc Osman üzerinde karâr ve ziyâde ile tâlib-i âharı zuhûr etmemekle hısas-ı mezkûre cânib-i vakıfdan kendüye tefvîz olunduğunu mezbûr el-Hâc Hasan Ağa meclis-i şer‘de takrîr ve zabtı içün taraf-ı vakıfdan yedine temessük i‘tâsını istid‘â ve hisse tevzî‘ni bi’l-cümle kethüdâ ve ustalar ma‘rifetleriyle ahz etmek üzere mazbûtü’l-esâmî kasab ustaları hâzır oldukları hâlde ta‘ahhüd etmeğin zikr olunan Mirgûn karyesinde vâki‘ dükkân gediğinin sülüs hisse[si] başka ve sâlifü’l-beyân dört bâb dekâkîn gediklerini her birlerinden südüs hisselerini başka başka mezbûr el-Hâc Hasan Ağa üzerine mu‘accele-i merkūmeleriyle tahrîr ve yedine taraf-ı vakıfdan temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene [12]37