İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 380 Hüküm no: 363 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Hâfız Ahmed b. Hasan’ın vefâtı üzerine Mercanlı Ali Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu-hazretlerinin evkāf-ı şerîfeleri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden sekizinci selhhâneye merbût kasab dükkânlarından mahmiye-i mezbûrede Balıkçılar içinde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin iki humus hissesiyle yine selhhâne-i mezbûreye merbût Mimar çarşısında kâin ma‘lûmü’l-hudûd bir bâb kasab dükkânı derûnunda mevcûde kezâlik gedik tâ‘bir olunur âlât-ı lâzıme-i ma‘lûmenin nısf hissesine ber-mûceb-i temessük-ı mütevellî mutasarrıf olan Hâfız Ahmed b. el-Hâc Hasan fevt olup hisse-i mezkûreleri sulbî oğulları Hafız Ali ve Mehmed Emin ve sulbiye kızı Âişe’ye intikāl-ı âdi ile ba‘de’l-intikāl mezbûr Hafız Ali dahi bilâ-veled fevt oldukda zikr olunan Samatya’da balıkçılar içinde kâin dükkân gediğinin iki humsundan ve sâlifü’l-beyân mimar çarşısında kâin dükkân gediğinin nısfından sülüs hisseleri mahlûl ve cânib-i vakfa âid oldukdan sonra mâ‘adâ sülüsân hisseleri babaları intikālından mutasarrıflar olan mezbûr Mehmed Emin ile mezbûre Âişe taraflarından ber-vech-i âtî ferağa vekîlleri olduğu mezbûre Âişe’nin zâtını ârifân el-Hâc Feyzullah Ağa b. el-Hâc Mehmed ve el-Hâc Hasan Ağa b. el-Hâc Halil nâm kimesneler şehâdetleriyle ber-nehc-i şer‘î sâbit olan kasablar kethüdâsı el-Hâc Hasan Ağa b. el-Hâc Osman meclis-i şer‘-i enverde kasab ustalarından Mercanlı el-Hâc Ali Ağa b. el-Hâc Osman muvâcehesinde müvekkillerim mezbûrân Mehmed Emin ve Âişe bâlâda tahrîr olunduğu üzere babaları intikālından mutasarrıf oldukları zikr olunan balıkçılar içinde kâin dükkân gediğinin iki humusundan ve sâlifü’l-beyân mimar çarşısında kâin dükkân gediğinin nısfından sülüsân hisselerini hüsn-i rızâ ve tayyib-i hâtırlarıyla bi’l-vekâle mezbûr Mercanlı el-Hâc Ali Ağa’ya bâ-re’y-i mütevellî ferağ ve tefvîz eylediğimde ol dahi tefevvüz ve kabûl ve hisse tevzî‘ini kethüdâ ve ustalar ma‘rifetleriyle ahz etmek üzere ta‘ahhüd eyledi deyü kasab ustalarından mazbûtü’l-esâmî kimesneler hâzır oldukları hâlde bi’l-vekâle eylediği takrîrini mezbûr Mercanlı el-Hâc Ali Ağa ba‘de’t-tasdîk zikr olunan balıkçılar içinde kâin dükkân gediğinin humusundan ve sâlifü’l-beyân mimâr çarşısında kâin dükkân gediğinin nısfından sülüsân hisseleri mezbûrân Mehmed Emin ve Âişe ferağlarından kendi üzerine tahrîr-birle tasarrufu içün taraf-ı vakıfdan şürûtu mûcebince yedine temessük i‘tâsı niyâzında olduğu İstanbul Mahkemesi’nden huzûr-ı âlîlerine i‘lâm olundu. Fî 14 Receb sene 1237