İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 381 Hüküm no: 364 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, Andon v. İstirato ve Yani v. Hristo üzerindeki kasap dükkânı gediğinin Hasan Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı şerîfileri müstegallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden beşinci selhhâneye merbût kasab dükkânlarından mahrûse-i Galata’ya muzâfe kasaba-i Beşiktaş’a tâbi‘ Kuruçeşme karyesinde kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf semen hissesine bâ-temessük mutasarrıf olan Andon v. İstirato ve diğer nısf semen hissesine mutasarrıf olan Yani v. Hristo nâm zimmîler bundan akdem diyâr-ı âhara firâr etmeleriyle Rum tâifesinin zâhir olan hıyânet ve mel‘anetlerinde medhali olan firârilerinin bi’l-cümle emvâl-i metrûkeleri cânib-i mîrîden zabta irâde-i aliyye ta‘allukuna binâen vakf-ı hazret-i müşârun-ileyh tasarruflarında bulunan akār ve gedikleri dahi cânib-i vakıfdan zabt ve mu‘accele ile âhara verilmek bâbında dahi irâde-i seniyye ta‘alluk eylediğini müş‘ir cânib-i vakf-ı müşârun-ileyhe ve İstanbul mahkemesine vârid olan ilmühaber kāimeleri mûceblerince dükkân-ı mezkûr gediğinden ber-vech-i muharrer mesfûrûndan her birinin nısf-ı sümün hisselerinden cem‘an sümün-i hissesi cânib-i vakıfdan ba‘de’z-zabt lede’l-müzâyede ve inkıtâ‘u’r-rağbe mu‘accele-i misliyyesi idüğü zâhir olan iki yüz elli guruş mu‘accele-i makbûza ile hâlâ kasablar kethüdâsı el-Hâc Hasan Ağa b. el-Hâc Osman üzerinde karar etmekle ziyâde ile tâlib-i âharı zuhûr etmemeğin sümün-i hisse-i mezkûre taraf-ı vakıfdan kendüye tefvîz olunduğu [75a] merkūm Kethüdâ el-Hâc Hasan Ağa meclis-i şer‘de takrîr ve zabtı içün taraf-ı vakıfdan temessük i‘tâsını istid‘â ve hisse tevzî‘ini bi’l-cümle kethüdâ ve ustalar ma‘rifetleriyle ahz etmek üzere kasab ustalarından mazbûtü’l-esâmî kimesneler hâzır oldukları hâlde ta‘ahhüd etmeğin hisse-i mezkûre ber-vech-i muharrer mu‘accele-i merkūme ile mezbûr Kethüdâ el-Hâc Hasan Ağa üzerine tahrîr ve taraf-ı vakıfdan yedine temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene 1237