Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 312 Hüküm no: 336 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Dimo’nun tezgâhtarı Simo v. İstirati’de alacağı olduğu Mahmiye-i İstanbul’da Denizhamamı fırını ustası olan işbu bâ‘isü’l-vesîka Kiro v. Dimo nâm zimmî meclis-i şer‘-i şerîf-i enverde mukaddemâ destgâhdârı olan Simo v. İstirati nâm zimmî muvâcehesinde üzerine da‘vâ ve takrîr-i kelâm edip mezbûr Simo iki yüz on sekiz gün mârrü’z-zikr fırında destgâhdârım olup mezbûru ihrâc ve târih-i kitâbdan bir gün mukaddem beynimizde hesâb gördüğümüzde bana teslîm eylediği bir re’s bârgir sekiz bin sekiz yüz seksen akçe ve bir kara kılıç hesâbımıza dâhil ve deynine takās olunduğundan mâ‘adâ ba‘de külli’l-hesâb otuz bin yedi yüz kırk akçe bana zimmetinde lâzımü’l-edâ deyni olduğu zâhir ve meblağ-ı mezbûr bana zimmetinde deyni olduğunu alâ ruûsi’l-işhâd ikrâr ve işhâd etmeğin hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Simo husûs-ı mezbûru inkâr edicek müdde‘î-i mezbûrdan müdde‘âsına beyyine taleb olundukda hâlâ kapan kethüdâsı olan el-Hâc Fazlullah b. Mahmud ve ekmekçiler yiğitbaşısı olan Mustafa b. İbrahim ve Sâlih Hasan b. Osman nâm kimesneler ile yine ekmekçi tâifesinden Dimo v. Hırsafo ve Mano v. Yuvan nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu mezkûr Simo v. müdde‘î-i mezbûrun destgâhdârı olmağla târih-i kitâbdan bir gün mukaddem bâlâda tafsîl olunduğu minvâl üzre mezkûr Kiro’ya teslîminden mâ‘adâ ba‘de külli’l-hesâb müdde‘î-i mezbûra otuz bin yedi yüz kırk deyni zuhûr etmekle meblağ-ı mezbûr ber vech-i mastûr lâzımü’l-edâ deyni olduğunu bizim huzûrumuzda ikrâr ve i‘tirâf etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm meblağ-ı mezbûr otuz bin kırk akçeyi müdde‘î-i mezbûra edâ ve teslîme mezkûr Simo’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi b. Ahmed, Mustafa Çelebi b. Abdurrahman, Ali b. Bâli.