İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 382 Hüküm no: 365 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Osman Ağa ve Hasan Ağa’nın ferağlarından Feyzullah Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı şerîfeleri müstagallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden sekizinci selhhâneye merbût kasab dükkânlarından mahmiye-i mezbûrede Koska nâm mahalde kâin ma‘lûmü’l-hudûd ve bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf hisse-i şâyi‘asına bâ-temessük-ı mütevellî mutasarrıf olan el-Hâc Osman Ağa b. el-Hâc Ali tarafından vekîl olduğu el-Hâc Hasan Ağa b. Halil ve diğer el-Hâc Hasan Ağa b. el-Hâc Osman nâm kimesneler şehâdetleriyle ber-nehc-i şer‘î sâbit olan Mehmed Ağa b. Mehmed Emin meclis-i şer‘-i münîrde âlât-ı lâzıme-i mezkûrenin kezâlik bâ-temessük-ı mütevellî nısf-ı şâyi‘-ı âharına mutasarrıf olan mezbûr el-Hâc Hasan Ağa b. Halil hâzır olduğu hâlde kasab ustalarından el-Hâc Feyzullah Ağa b. el-Hâc Mehmed muvâcehesinde müvekkilim merkūm el-Hâc Osman Ağa zikr olunan kasab dükkânı âlât-ı lâzıme-i mezkûresinden nısf hisse-i şâyi‘a-i mezkûresini bin iki yüz otuz beş senesi Zilka‘deti’ş-şerîfesinin ikinci günü mezbûr el-Hâc Feyzullah Ağa’ya benim vekâletimle ferağ ve tefvîz ol dahi tefevvüz ve kabûl edüp ber-vech-i muharrer bi’l-vekâle ferağım taraf-ı şer‘den ba‘de’l-i‘lâm cânib-i vakıfdan dahi hâmiş-i temessükde mezbûr el-Hâc Feyzullah Ağa üzerine tahrîr olunup lâkin ol târihde vakf-ı müşârun-ileyh mütevellîsi temhîr etmeden temessük i‘tâ olunup hâlâ temhîr olunmamağla hâlâ izn-i mütevellî lâhık olmadığına binâen hâlâ ben müvekkilim merkūm el-Hâc Osman Ağa’nın nısf hisse-i mezkûresini bi’l-vekâle ve hâzır-ı merkūm el-Hâc Hasan Ağa dahi âlât-ı mezkûreden mutasarrıf olduğu âhar nısf hissesini bi’l-asâle mezbûr el-Hâc Feyzullah Ağa’ya bâ-re’y-i mütevellî ferağ ve tefvîz eylediğimizde ol dahi tefevvüz ve kabûl ve hisse tevzî‘ini kethüdâ ve ustalar ma‘rifetleriyle ahz etmek üzere kasablar kethüdâsı el-Hâc Hasan Ağa ve mazbûtü’l-esâmî kasab ustaları hâzır oldukları hâlde ta‘ahhüd eyledi deyü bi’l-vekâle eylediği takrîrini hâzır-ı asıl-ı mezbûr el-Hâc Hasan Ağa ile merkūm el-Hâc Feyzullah Ağa ba‘de’t-tasdîk zikr olunan Koska’da kâin kasab dükkânı gediği müvekkil-i mezbûr el-Hâc Osman Ağa ve merkūm el-Hâc Hasan Ağa’nın ferağlarından mezbûr el-Hâc Feyzullah Ağa üzerine tahrîr ve tasrîhi içün taraf-ı vakıfdan şürûtu üzere yedine temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 14 Receb sene 1237