İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 383 Hüküm no: 366 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, kasap dükkânı gediğinin Mehmed Tahir b. Halil ile Halil b. Halil’in vefâtı üzerine Hasan Ağa’ya devredilmesi Kasab inhâsı Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm Sultan Abdülhamid Hân -tâbe serâhu- hazretlerinin evkāf-ı şerîfeleri müstagallâtından mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden yedinci selhhâneye merbût kasab dükkânlarından mahmiye-i mezbûrede Sultan Bâyezid Hân-ı Velî -tâbe serâhu- Câmi‘-i şerîfi havlusunda çömlekçiler hizâsında kâin ikinci ma‘lûmü’l-hudûd bir bâb ve yine zikr olunan selhhânelerden ikinci selhhâneye merbût câmi‘-i şerîf-i müşârun-ileyh havlusunda küpçüler tarafında kâin ma‘lûmü’l-hudûd diğer bir bâb kasab dükkânı derûnlarında mevcûde beyne’l-esnâf gedik tâ‘bir olunur âlât-ı lâzıme-i ma‘lûmelerin üçer hisse i‘tibâriyle ikişer hissesine iştirâken mutasarrıflar olan Mehmed Tahir ve Halil ibney el-Hâc Halil’den her biri müte‘âkiben bilâ-veled fevt olup zikr [olunan] dükkânlar ve gediklerinden i‘tibâr-ı mezkûr üzere ikişer sehm hisseleri mahlûle ve cânib-i vakfa âid ve râci‘ oldukdan sonra hisse-i mezkûreleri lede’l-müzâyede ve inkıtâ‘u’r-rağbe mu‘accele-i misliyyeleri idüğü zâhir olan bin beş yüz guruş mu‘accele-i makbûza ile kendi nefsinden asıl ve el-Hâc Hasan Ağa b. el-Hâc Halil tarafından vekîl-i şer‘îsi hâlâ kasablar kethüdâsı diğer el-Hâc Hasan Ağa b. el-Hâc Osman üzerinde karâr etmekle ziyâde ile tâlib-i âharı zuhûr etmemeğin zikirleri mürûr eden iki dükkân gediklerinden her birinden i‘tibâr-ı mezkûr üzere ikişer hissesi mu‘accele-i makbûza-i merkūme ile iştirâken asıl ve müvekkil-i mezbûrâna taraf-ı vakıfdan tefvîz olunduğu asıl ve vekîl-i mezbûr Kethüdâ diğer el-Hâc Hasan Ağa meclis-i şer‘de takrîr ve ber-vech-i muharrer iştirâken tasarrufları içün taraf-ı vakıfdan temessük i‘tâsını istid‘â ve hisse tevzî‘ini kethüdâ ve ustalar ma‘rifetleriyle ahz etmek üzere kasab ustalarından mazbûtü’l-esâmî kimesneler hâzır oldukları hâlde mezbûr kethüdâ diğer el-Hâc Hasan Ağa bi’l-asâle ve bi’l-vekâle ta‘ahhüd etmeğin zikr olunan iki bâb dükkânı ve gediklerinin her birinden i‘tibâr-ı mezkûr üzere ikişer hissesi müteveffiyân-ı mezbûrânın mahlûllerinden mu‘accele-i merkūme ile müvekkil-i merkūm el-Hâc Hasan Ağa ile asıl ve vekîl-i mezbûr kethüdâ diğer el-Hâc Hasan Ağa üzerine tahrîr ve yedlerine taraf-ı vakıfdan temessük i‘tâsı niyâzında olduğu İstanbul Mahkemesi’nden huzûr [-ı âlîlerine i‘lâm olundu.] Fî 12 Receb sene 1237