Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 312 Hüküm no: 337 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Dimo’nun Aleksi v. Niko’dan alacağını tahsil ettiği Kasab tâifesinden olup kasaba-i Kasımpaşa’da Tersânekapısı kurbunda sâkin Apostol v. Dimo nâm zimmî meclis-i şer‘-i şerîf-i enverde celeb-keşân tâifesinden olup mahmiye-i İstanbul’da Edirnekapısı kurbunda sâkin işbu bâ‘isü’s-sifr Aleksi v. Niko v. Andron nâm zimmî muvâcehesinde ikrâr ve takrîr-i kelâm edip bundan akdem mezbûr Aleksi’den ben sana ve babana beş buçuk sene mikdârı hizmet etmekle zimmetinizde müctemi‘a olan ücret-i ma‘lûmemden ba‘de külli’l-hesâb kırk beş guruş hakkım bâkī kalmışdı [52b] deyû meblağ-ı bâkī kırk beş guruşun nısfı taleb ve da‘vâ eylediğimde beynimizde nizâ‘-ı küllî vukū‘undan sonra muslihûn tavassut edip mezbûr Aleksi benimle yirmi guruş üzerine sulh olmuşdur ben dahi sulh-i mezbûru kabûl ve bedel-i sulh olan meblağ-ı mezbûr yirmi guruşu mezbûr Aleksi yedinden ahz u kabz eylediğimden sonra bâkī kalan yirmi beş guruş ve bi’l-cümle husûs-ı mezbûra müte‘allik âmme-i da‘vâdan merkūm Aleksi’nin ve babası mezbûr Diyako’nun zimmetlerini ibrâ-i âmla ibrâ ve iskāt eyledim min ba‘d da‘vâ ve nizâ‘ımız kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mehmed b. Halil, Halil Çelebi b. Ali, Mustafa b. İsmail, Hasan Çelebi b. Hüseyin, Halil Çelebi b. İbrahim, Ahmed Beşe b. Ali Çukadâr, Mehmed Bey b. İbrahim, İlya v. Nikola.