İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 393 Hüküm no: 376 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oseb v. Artin’in, mâlik olduğu boyacı dükkânı gediğini Bağdısar v. Ohannes’e sattığı Bogasıcı dükkânı mübâya‘ası ve ismine kaydı Ma‘rûz[-ı dâ‘î-i devlet-i aliyyeleridir ki] Zikri âtî gedik âlâtına mâlik olan Oseb v. Artin nâm zimmî meclis-i şer‘-i münîrde Bağdısar v. Ohannes nâm zimmî muvâcehesinde mahmiye-i İstanbul’da Mahmudpaşa Câmi‘-i şerîfi kurbünde müteveffâ Rüstempaşa Evkāf-ı şerîfesi müsakkafâtından Sultan Odaları demekle arîf hanın hâricinde vâki‘ altı bâb dükkânlardan sol tarafda kapı ittisâlinde kâin bir bâb bogasıcı dükkânı derûnunda mevcûde beyne’l-hiref gedik tâ‘bir olunur akd-i âti’z-zikrin sudûruna değin bir kıt‘a sûret mûcebince yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî mersûm Bağdısar zimmîye sekiz yüz guruş semen-i makbûza bey‘ ve temlîk ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d zikr olunan âlât-ı lâzıme-i ma‘lûmede benim kat‘an alâka ve medhalim kalmayup mersûm Bağdısar zimmînin müşterâsı ve hakk-ı sırfı olmuşdur deyü her biri ba‘de’l-ikrâr ve’t-tasdîk âlât-ı lâzıme-i mezkûrenin kaleminde mesfûr Oseb zimmî ismine olan kaydı ref‘ ve terkīn ve atîk sûreti battâlda hıfz olunarak müşteri-i mesfûr Bağdısar zimmî ismine kayd-birle yedine bir kıt‘a sûret i‘tâsı bâbında istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 11 Za sene 1237