İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 393 Hüküm no: 377 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya v. Mardiros’un, mâlik olduğu oda gediğini Acı Markar v. Delot’a sattığı Yağcı hanında oda gediği mübâya‘ası ve ismine kaydı Ma‘rûz[-ı dâ‘î-i devlet-i aliyyeleridir ki] Zikri âtî gedik âlâtına mâlik olan Ağya v. Mardiros nâm zimmî meclis-i şer‘-i şerîf-i enverde Acı Markar v. Delot nâm zimmî muvâcehesinde akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan defterdâr-ı esbak merhûm Abdüsselam Efendi Vakfı müsakkafâtından mahmiye-i İstanbul’da Nuruosmaniye Câmi‘-i şerîfi kurbünde kâin Yağcı Hanı demekle arîf bir bâb kârgîr hanın tabaka-i vustâsında sağ cânibinde sofcular tarafında vâki‘ köşeye muttasıl şehriye beş guruş kadîm kirâlı bir bâb sagīr oda derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Acı Markar zimmîye bin iki yüz guruş semen-i makbûza bey‘ ve temlîk ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup mersûm Acı Markar zimmînin mâl-ı müşterâsı ve hakk-ı sırfı olmuşdur deyü her biri ba‘de’l-ikrâr ve’t-tasdîk gedik-i merkūmun mersûm Ağya zimmî üzerinde olan kaydı ref‘ ve terkīn ve müşreti-i mesfûr Acı Markar zimmî ismine kayd ile atîk sûreti battâlda hıfz olunarak müşteri-i mersûm Acı Markar zimmî yedine bir kıt‘a sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 9 Za sene 1237