İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 394 Hüküm no: 378 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varna’daki çerviş ve don yağlarının İstanbul ve Galata yağ kapanlarına getirilmesi gerektiği Ma‘rûz[-ı dâ‘î-i devlet-i aliyyeleridir ki] Varna Kalesi ahâlîsinin revgan-ı çerviş ve don husûsunda muzâyakaları olup sene-i sâbıkāda Rayone gölü kurbünde bir bâb selhhâne ihdâs etmeleriyle ahâlîye vâfî birkaç parça sürek zebh olunup hâsıl olan revgan kapan tarafına verilmiş olduğundan bahisle bundan böyle beher sene maktû‘ olarak fiyat-ı mu‘ayyenesiyle kapan tarafına üçer bin vakıyye revgan verilmek üzere ahâlînin idârelerinde vâfî birkaç sürek zebh olunması bâbında ruhsatı hâvî bir kıt‘a emr-i âlî ısdârı istirhâmlarını müş‘ir Varna nâibinin işbu arızâya merbût bir kıt‘a i‘lâmını takdîmle keyfiyet-i i‘lâm-ı mezkûr meâlinden müstebân olacağı ifâdesi hâlâ Varna muhâfızı mir-i mîrân-ı kirâmdan Sa‘âdetlü Osman Paşa dâ‘îlerinin işbu arızâsı mefhûmundan ve Varna’da ihdâs olunan selhhânede kesilen on sürekden iki yüz yedek mikdârı yağ hâsıl olup zikr olunan yağın yedeklerine mevzû‘an Dersa‘âdet’e irsâli lâzımeden iken yedeklere vaz‘ olunmayup fıçılar ile âhar mahallere dağıldığı tahkīk olunmağla selhhâne-i mezkûrede husûle gelen yağlar sâir mahallerde olduğu o vechile yedeklere mevzû‘an peyderpey Dersa‘âdet’e kapana nakl ve tisyâr olunmak bâbında işbu otuz yedi senesi evâil-i Muharreminde sâdır olan fermân-ı âlîşân mahalline lede’l-vürûd selhhâne-i mezkûrede mevcûd olan yağ zabt olunup Der-aliyye’ye irsâl olunmakda idüğü ve bundan sonra ne mikdâr husûle gelir ise Dersa‘âdet’e irsâl olunacağını nâtık vârid olan tahrîrât ve i‘lâm mazmûnları sene-i mezbûre Saferi’l-hayrının on beşinci günü târihiyle ve selhhâne-i mezkûrede şimdiye kadar yirmi yedi yedek yağ hâsıl olup iskeleye nakl ve Dersa‘âdet’e irsâl olunmakda idüğünü nâtık kezâlik vârid olan tahrîrât mazmûnu yine sene-i merkūme şehr-i Rebî‘ülevvelinin sekizinci günü târihiyle bâ-fermân-ı âlî emr-i âli-i mezkûrun kaydı bâlâsına şerh verilmiş idüğü derkenârlar meâllerinden ve zikr olunan selhhâne hâsılâtından sene-i merkūmede hâsıl yağdan Âsitâne-i aliyyeye irsâl olunmak üzeredir deyü mukaddem tahrîr olunan yirmi yedi yedek revgandan Âsitâne-i aliyyeye bal kapanına ancak on dört yedek don ve çerviş yağı vârid olduğu işbu arîzaya merbût olan kapan nâzırı tezkiresinden müstebân olmağla bu sûretde ahâlî-i merkūmûnun istid‘âlarına müsâ‘ade yâhud Âsitâne-i aliyye ve Galata kapanlarının selhhâne yağları nizâmının ihtilâlden vikāyesi zımnında mukaddem sâdır olan emr-i âlinin tekîdini hâvî fermân-ı âlîşân ısdârı re’y-i sâmîlerine menût idüğü imtisâlen li’l-emri’l-âlî İstanbul Mahkemesi’nden huzûr-ı âlîlerine i‘lâm olundu. Fî 15 Za sene 1237