Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 313 Hüküm no: 338 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Ali’nin Hacı Ali Efendi b. Abdurrahman’a olan borcunu ödediği ve rehin verdiği eşyayı geri aldığı Mahmiye-i İstanbul’da Yenibahçe kurbunda Keçeciler kurbunda sâkine olup zâtı ma‘rifet-i şer‘iyye ile ârifân olan mezbûre Havva’nın li ebeveyn er karındaşı Osman b. Ali ve Mustafa b. Abdullah nâm kimesneler ta‘rîfleriyle mu‘arrefe olan İsmihan bt. Ali nâm hâtun meclis-i şer‘-i şerîfde mahmiye-i mezbûrda Debbâğ Yunus mahallesinde sâkin el-Hâc Ali Efendi b. Abdurrahman tarafından husûs-ı âti’l-beyâna vekîl olduğu Kenan b. Abdullah ve Mustafa b. Abdullah nâm kimesneler şehâdetleriyle şer‘an sâbit olan İbrahim Çelebi b. Süleyman mahzarında ikrâr-ı tâm ve takrîr-i kelâm edip müvekkil-i mezbûr el-Hâc Ali Efendi’ye işbu hat ve hatmi hâviye deyn temessükü nâtık olduğu üzre zimmetimde dört yüz altmış guruş deynim olup meblağ-ı mezbûr iki yüz seksen yedi guruşu mezbûr el-Hâc [Ali] Efendi’ye ve yüz altmış üç guruşunu vekîl-i mezbûr İbrahim Çelebi’ye teslîm edip mezbûrân el-Hâc Ali Efendi ve İbrahim Çelebi’den her biri ahz u kabz eylediklerinden sonra bâkī on guruş da‘vâsından vekîl-i mezbûr İbrahim Çelebi benim zimmetimi ibrâ ve iskāt eylediğimden sonra meblağ-ı mezbûr dört yüz altmış guruş mukābelesinde müvekkil-i mezbûr el-Hâc [Ali] Efendi yedine alâ tarîki’r-rehn vaz‘ ve teslîm eylediğim eşyâ-i memlûkemden inci esfârı ile altın küpe ve def‘a ortası la‘l taşlı bir çift altın küpe ve bir altın hançer ve dokuz aded altından düğme ve bir altın saç bağı ve yine dokuz aded şerîfî altından bir saç bağı ve bir sîm kuşak ve bir sâ‘atimi vekîl-i mezbûr İbrahim Çelebi işbu meclis-i şer‘-i şerîfde ba‘de’l-fek bana teslîm ben dahi eşyâ-i mezkûreyi bi’t-tamâm yedinden kabz ve tesellüm eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Recebi’l-mürecceb li sene seb‘a ve tis‘în ve elf. Şuhûdü’l-hâl: Halil Çelebi b. Receb, Mustafa b. Abdullah, Kenan b. Abdullah, el-Hâc Mustafa b. Tevekkül, İbrahim b. Mehmed.