İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 402 Hüküm no: 389 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamparsum v. Mikail’in sahip olduğu kazzaz gediğini Artin v. Andon’a sattığı Örücüler içinde kazzâz Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe kasaba-i Beşiktaş’da Sinanpaşa Mahallesi’nde mütemekkin iken bundan akdem hâlik olan Hamparsum v. Mikail zimmînin verâseti zevce-i metrûkesi Katerine bt. Kazer nâm Nasrâniye ile sulbiye kebîre kızları Saltana ve Eskohi Nasrâniyeler ve li-eb er karındaşları Serope zimmî ve Mısır-ı Kahire’de mütemekkin âhar li-eb karındaşı Takfor zimmîye münhasıra ve tashîh-i meselesi kırk sekiz sehmden olup sihâm-ı mezbûrenin altı sehmi zevce-i mersûme Katerine Nasrâniye’ye ve on altışar sehmi mesfûretân Saltana ve Eskohi Nasrâniyelerden her birine ve beşer sehmi karındaşları mesfûr Serope zimmî ile gāib-i mesfûr Takfor zimmîden her birine isâbeti tahakkukundan sonra zevce-i mesfûre Katerine Nasrâniye ile mesfûretân Saltana ve Eskohi Nasrâniyeler taraflarından husûs-ı âtîde vekîlleri olduğu şahıslarını bilir diğer Takfor v. Gabril ve Asvador v. Begos nâm zimmîler şehâdetleriyle ber-nehc-i şer‘î sâbit olup gāib-i mesfûr Takfor zimmînin hisse-i irsiyyesini ahz ü kabz ve zabt ve hıfza ve kendüye irsâl ve îsâle kıbel-i şer‘den vasî ve kayyım nasb olunan mesfûre Saltana Nasrâniyenin zevci Sarraf Kirkor v. Gabril nâm zimmî hâlik-i mesfûrun li-eb karındaşı mesfûr Serope zimmî hâzır olduğu hâlde meclis-i şer‘-i münîrde Artin v. Andon nâm zimmî muvâcehesinde kazzâzlar kethüdâsı Abdüllatif Ağa ve Yiğitbaşı Molla Mehmed ile kazzâz ustalarından Kirkor ve Agob zimmîler hâzır oldukları hâlde mahmiye-i İstanbul’da Uzunçarşı nâm mahalde vâki‘ Kebeciler Hanı civârında örücüler içünde bir tarafı Ârif Ağa dükkânı ve bir tarafı İpekçi Bedros zimmî dükkânı beynlerinde kâin bir kepenk bir bâb kazzâz dükkânı derûnunda mevcûde beyne’l-hiref gedik tâ‘bir olunur âlât-ı lâzıme-i ma‘lûme hâlik-i mesfûrun sağlığında yedinde zâyi‘ olan bir kıt‘a sûret ile ile’l-helâk elinde mâlı ve mülkü olup ba‘de helâkihi ber-tashîh-i mezkûr veresesine mevrûs oldukdan sonra ben ve hâzır-ı mersûm Serope zimmî zikr olunan kazzâz âlât-ı lâzıme-i ma‘lûmesini tarafeynden bi’l-îcâb ve’l-kabûl bâtten ve sahîhan bi-safkatin vâhidetin semen-i misli idüğü bi’l-ihbâr zâhir olan beş bin guruşa mesfûr Artin zimmîye bi’l-vekâle ve bi’l-vesâye ve bi’l-verâse bey‘ ve temlîk ve teslîm eylediğimizde ol dahi yedimizden iştirâ ve temellük ve tesellüm ve kabz ve kabûl ve semen-i merkūm beş bin guruşu benimle hâzır-ı mersûm Serope zimmîye def‘ ve teslîm biz dahi yedinden bi’l-vekâle ve bi’l-vesâye ve bi’l-verâse ahz ü kabz ve hâlik-i mesfûrun defter-i kassâma idhâl ve ber-tashîh-i merkūm bi-kadri’l-hısas iktisâm edüp mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî bi’l-vesâye ve bi’l-vekâle ibrâ ve iskāt ve bi’l-vesâye kat‘-ı nizâ‘ etmemizle fîmâ ba‘d zikr olunan kazzâz gediği tâ‘bir olunur âlât-ı lâzıme-i ma‘lûmede müvekkilelerim mesfûrât Katerine ve Saltana ve Eskohi Nasrâniyelerin ve vasîsi olduğum gāib-i mersûm Takfor zimmînin kat‘an alâka ve medhalleri kalmayup mesfûr Artin zimmînin mâl-ı müşterâsı ve hakk-ı sırfı olmuşdur deyü hâzır-ı mesfûr Serope zimmînin tasdîkiyle bi’l-vekâle ve bi’l-vesâye eylediği ikrâr u i‘tirâfını mesfûr Artin zimmî dahi ba‘de’t-tasdîk zikr olunan kazzâz gediği tâ‘bir olunur âlât-ı lâzımenin kaleminde hâlik-i mesfûr Hamparsum zimmî üzerinde olan kayd-ı atîki ref‘ ve terkīn ve zâyi‘ olan atîk sûreti zuhûr eder ise amel ve i‘tibâr olunmamak üzere kendi ismine tashîhan kayd-birle yedine sûret i‘tâ buyrulmak bâbında istid‘â-yı inâyet eylediği İstanbul Mahkemesi’nden [huzûr-ı âlîlerine i‘lâm olundu.] Fî 27 Za sene [1]237